KANUKOKA-p siulittaasuata Martha Abelsenip aammalu ilinniartitaanermut ilisimatusarnermullu Naalakkersuisup Palle Christiansenip suliassaqarfiit persorsaanikkut tarnillu pissusiisigut siunnersuisarnerup (PPR) aamma annertusisamik immikkut atuartitsisarnerup (VSP) 2012-imi januaarip aallaqqaataani kommuninut tunniunneqarnissaannik isumaqatigiissut ullumi atsiorpaat - Naalakkersuisut Inatsisartullu aningaasaqarnermut ataatsimiititaliaata akuersinissaat apeqqutaatillugu.

Martha Abelsen oqarpoq kommunini qullersaasut suliassaqarfimmik tigusinissartik qilanaarutigigaat, taamaalilluni kommunini assigiiaamik ataatsimoortumillu suliniuteqartoqarsinnaanngussammat meeqqanut inuusuttuaqqanullu tunngatillugu.

Palle Christiansen oqarpoq tamanna Naalakkersuisut meeqqanut inuusuttunullu politikkiannut naapertuuttoq.

"Ilinniartitaanikkut, meeqqanik inuusuttuaqqanillu isumaginninnermi periusissiornikkut kiisalu meeqqanut ilaqutaannullu siusissukkut iliuuseqartarnikkut nukittorsaanissaq Naalakkersuisut sulissutigisimavaat. Suliassaqarfimmillu pineqartumik tunniussinikkut suliniutit imminnut pitsaane­rusumik sunniuteqaqatigiissinnaanngussapput," Palle Christiansen oqarpoq.

Perorsaanikkut tarnillu pissusiisigut siunnersuisarneq aamma annertusisamik immikkut atuartitsisarneq meeqqat atuarfiannut aammalu meeqqanik inuusuttuaqqanillu sullissinermut atatillugit suliassaqarfiupput pingaaruteqartut.

Taamaalilluni PPR-ip atuuffia meeqqanut inuusuttunullu atuartitaasussaanerup avataaniittunut, tassa 18-it tikillugit ukiulinnut tamanut, tunngatinneqartussan­ngorlugu annertusineqarpoq.

PPR pingaartumik misissuinernik, oqaloqatiginninnernik, siunnersuinernik ilitsersuinernillu i­ngerlataqarfiuvoq. VSP-lu meeqqat atuarfianni immikkut ittumik atuartitsinernik immikkullu ittumik perorsaanermik ingerlatsiviuvoq.

Suliassaqarfiit taakku Namminersorlutik Oqartussanit kommuninut nuunneqarnissaat sivisuumik isumaqatigiinniutaasimavoq. Maanna tunngavissat killiliussassallu Kalaallit Nunaanni meeqqanut inuusuttuaqqanullu iluaqutissaasumik inissinneqartut KANUKOKA-p siulittaasua aamma ilinniartitaanermut ilisimatusarnermullu Naalakkersuisoq misigisimapput.

PPR-imut VSP-mullu aningaasaliissutit katillugit 69 mio. kr. missaanniipput. Isumaqatigiissut atsiornilik ilisimatitsissutitut ilanngupparput - taannalu aamma aaneqarsinnaavoq nittartakkani www.nanoq.gl-imi aamma www.kanukoka.gl-imi.

Isumaqatigiissut pillugu erseqqinnerusunik oqaaseqartitsiniaraanni uku saaffigineqarsinnaapput: Palle Christiansen, tima@nanoq.gl/tlf. 34 50 00, aaamma Martha Abelsen maab@kanukoka.gl /tlf. 36 21 00.