Kommunit sinnerlugit nuannaarutigaara qarasaasiat atorlugit innuttaasunut sullissiviliorneq maanga killissimammat internetikkut nittartagaq Sullissivik.gl maanna tamanut saqqummiunneqarsinnaanngorluni.

Sullissinermi atortorissaarut maanna pilersinneqarsimasoq ineriartorteqqinniarneqartorlu tulluartorujussuuvoq: Internettikkut nittartagaq sullissisunit innuttaasunillu ataatsikkut atorneqarsinnaasoq paasissutissanik atortussanillu pisariaqartitanik aallerfigalugu - soorlumi tassa sullissisup allaffiata "tallissutaa", imaluunniit kommunip allaffiata ilaa internettikkoortoq.

Soorlu Naalakkersuisunut ilaasortap oqaatigereeraa, suliniut pineqartoq kommunit aamma Namminersorlutik Oqartussat suleqatigiissutigaat.

Kommunit kattuffianni KANUKOKA-mi nuannaarutigisimavarput suliniummik ingerlatsisut sisamaasut allattoqarfitsinni inissaqartissinnaasimagatsigit. Peqqissaarlutik kajumillutillu su­liaminnik ingerlatsinerat maluginiartarparput. Taamaattumillu qularutiginngilarput Sullis­si­vik­.gl innuttaasunik kiffartuussinermi sakkuullualerumaartoq iluaqutaasoq - soorunami sul­lis­sisut innuttaasullu nittartakkamik atuinissaminnut periarfissaqarlutillu sungiussippata.

Suliniummi suleqataasut ilaat marluk www.sullissivik.gl-ip saqqummiunneqarnerani: Konsulent Bjarne Søholm Olsen aamma projektleder H. C. Sværd.

Sullissivik.gl-ip atuutilerneratigut kommunit nittartagaasa imaqarluartut sisamaasut atorfissaarutipajaarnissaat naatsorsuutiginngilluinnarparput. Akerlianilli Sullissivik.gl kommunit nittartagaannut tapertaassaaq, kommunillu nittartagaat kommunit innuttaasunut attaveqarniar­ne­ranni kommunillu pillugit paasissutissarsiortarnermi pingaaruteqartuassapput. Siunertaavormi Sullissivik.gl tassaassasoq paasissutissaateqarfik ataatsimoorussaq innuttaasunut sullissi­ner­mut pigititaasoq - paasissutissanik, ilitsersuutinik, immersugassanik skemanik assigisaannillu nunatsinni tamarmi atortussanik aallerfiusinnaasoq.

Innuttaasunut sullissiviit illoqarfinni nunaqarfinnilu pilersinneqarsimasut tamarmik Sullissi­vik.gl-imut attaveqarput, taakkunani sulisut sulinerminni nittartakkap imaanik atueriaan­naal­lutik. Innuttaasunut sullissivinni sulisut Sullissivik.gl-ip sinniisuisut, ambassadøriisut, taane­qar­sinnaapput, taa­maalillutik innuttaasut periarfissaqarnertik naapertorlugu namminneq nit­tartakkamik atui­nis­saannut ikiuussinnaallutik.

Oqaatigineqareersutut innuttaasunut sullissinermi nittartagaliorneq pisortat ataatsimoorlutik suliniutigisaraat. Suliassanik innuttaasunut sullissivinnut nuussisoqaraangat erseqqissunik najoqqutassiortoqartariaqartassaaq. Kommunimiit kommunimut assigiiaamik ingerlatsiso­qar­tarnissaa qulakkeerniarlugu suleqatigiittarnissaq pisariaqassaaq. Aammalu aqqissuussaanik­kut siuler­suinikkullu erseqqissunik tunngavissaqartariaqarpoq - taamaattumillu ingerlatsiviit akornanni isumaqatigiissusiortoqartariaqarluni.

Pisortat suliassaqarfiisa aaqqissuussaanerannik iluarsaaqqinnissaq oqallisigisareeqalugu kom­muninit tapersersorneqalersimaneranut tunngaviusunut pingaarnerpaanut ilaavoq innut­taasu­nut sullissinerup pitsanngorsarneqarnissaanik, assigiissarneqarnissaanik naammassisaqarfiul­luarnerunissaanillu kissaateqarneq.

Kissaatigisarlu tamanna, imaluunniit siunertaq pingaarneq, aalajangiusimasariaqarpoq. Taa­maattumik in­nuttaasunut sullissinermi nittartakkap Sullissivik.gl-ip ullumi saqqummiun­ne­qar­nera nuannaarutissaavoq - imaanngitsoq taanna immini anguniagaammat, kisiannili siu­nertap pingaarne­rup anguniarnerani sakkussaalluarmat. Innuttaasununummi sullissineq nalit­ta piu­ma­saanut naleqqussartariaqarpoq, tamatumanilu attaveqaqatigiinnikkut atorto­rissaarutit nutaat atorluarniagassaapput.

Martha Abelsen, KANUKOKA-p siulittaasua