|
Meeqqat Atuarfiat pillugu peqqussutissaq nutaaq atuarfimmik Atuarfitsialanngortitsisussaq Naalakkersuisut saqqummiuteqqammerpaat. Peqqussutissatut siunnersuutip siunnerfiit imarisallu pitsaasorpassuit imarai, taakkulu aningaasat pisariaqartut kiisalu ilinniartitsisut, atuarfiit kommunillu piareersimatinnagit iluarsartuussinermik piaarpallaartumik piviusunngortitsinikkut aserorneqartariaqanngillat. Peqqussutissatut siunnersuut suliariniarneqarmat pissusissamisuuginnartutut isigineqarsimavoq Atuarfitsialammi atuartalersussat minnerpaamik ullumikkutut nalunaaquttap akunnerinik atuarfissaqartassasut. Nalunaaquttap akunneri ukiunut 11-nut taarsiullugu ukiunut 10-nut agguaanneqaannartussaapput, atuarnerup ingerlanera eqikkaavigineruinnarlugu. Tunngavissaq taanna aammattaaq peqqussutissatut siunnersuusiami Naalakkersuisunit apriili 2001-imi tusarniaassutitut nassiussuunneqarsimasumi ilanngunneqarsimavoq. Kattuffiup tusarniaassummut akissuteqaammini aammalumi Naalakkersuisunik aasap ingerlanerani ataatsimeeqateqartarnermini tikkuaavigisarsimavaa peqqussutissatut siunnersuutip aningaasaqartinneqarnissaa – pingaartumik ukiuni tallimani ikaarsaariarfiusussani aaqqissuussinitoqqap ukiunik aqqanilinnik atuartitsiviusartup atorunnaarsikkiartorneqarnissaani, kiisalu nutaamik aaqqissuussinerup minnernut nalunaaquttap akunneqarnerulerluni atuutsikkiartorneqarnissaani. Taamatut tikkuaanermi erseqqissarneqarsimavoq ilinniartitsisut akissarsiaannut aningaasartuutaannarnut piffissami ikaarsaariarfiusumi atorneqartartussaasut atorneqartareersut qaavisigut 19 mio. kr.-nit, taakkununngali Naalakkersuisut naatsorsuussimagaluarlugit ukiumut 10 mio. kr.-nit missaat. Siunnersuummi immikkut pisariaqartunik aningaasaliinngeriarlutik taarsiullugu peqqussutissatut inaarutaasumik siunnersuummi massakkut Inatsisartunut saqqummiunneqartumi Naalakkersuisut atuartut atuarfigisartagassaat ilanngarteriffigisimavaat! Taamaaliornikkut Naalakkersuisut akuersaarpaat atuartitsinerup qaffasissusiata Atuarfitsialaap aallartinneraniilli ullumikkut peqqussutaasumit appasinnerutinneqarnissaa. Atuarfitsialammut suliniutaasumut pisortaatitat tusagassiuutini oqaatigaat ukioqatigiiaani ataasiakkaani atuartut nalunaaquttap akunnerinik amerlanerusunik atuartinneqartuaannassasut – tamannalumi eqqorpoq, oqaatigissalluguli ”puigorneqartoq” tassaaginnarluni atuartut massakkut ukiuni quliinnarni atuartalernissaat, taamaalillunilu katitsinermi nalunaaquttap akunneri ikinnerungaaqisut atuarfigineqartalersussaallutik. Atuarfitsialaliorsinnaanngilagut eqqunngitsunik tunngavissiilluta! Naalakkersuisut atuartut atuarfigisartagassaannik ikililereernerisa kingornagut Atuarfitsialak ukiuni ikaarsaariarfiusuni ilinniartitsisut akissarsiassaannut immikkut 7,6 mio. kr.-ninik aningaasartorfiu-sartussaassaaq. Aningaasat taakkunnguilluunniit Naalakkersuisut aningaasassarsiuukkusunngilaat. Aningaasartuutaanerulersussat angajoqqaanit atuartunillu aningaasalersortinneqassapput! Tassami siunnersuummi naatsorsuutigineqarsimavoq atuartunut 9. klassemiittunut qulliunerusuniittunullu atuarnersiutigitinneqartartut peerneqarnissaat. Atuarnersiutit angajoqqaat qanoq isertitaqartiginerat tunngavigalugu tunniunneqartarput, atuartullu affaasa missingajaat atuarnersiutisisarput. Tassalu ilaqutariit meerartallit akissarsiakinnerusut tassaassapput akiligassamik akiliisinneqartussat! Naalakkersuisut nukissanik pisariaqartunik pissarsiniarnissamut piumassuseqanngippata, taava pisariaqarpoq Atuarfitsialaap akissaqartinneqalernissaanut utaqqigutta. Ilinniartitaaneq eqqarsaatigalugu Meeqqat Atuarfiata ajornerulersinneqarnissaa akilersinnaanngilaq. Tassami Meeqqat Atuarfiat ilinniartitaanernut tunngaviuvoq, tassalu tassani aallartillutalu ilungersuuteqartariaqarpugut. Isumaga naapertorlugu massakkut Meeqqat Atuarfiat pillugu aningaasat imarisallu samminerpaajusariaqarpavut. Kingusinnerusukkut Ilisimatusarfissarsuarmut nukiit aningaasallu atorumaarpavut. Ullumikkut atuarfiit pisortaannit ilinniartitsisuinillu tusartarparput Atuarfitsialaap aggusti 2002-mi aallartinneqarnissaa piareersimaffigineqanngitsoq. Atuarfiit piffissaqarfigisariaqarpaat ilinniartitsinissanut pilersaarutinut, atuartitsissutigineqartartussanut aammalu atuartitsinerup nutaamik aaqqissugaallunilu piareersaavigineqartarnissaanut pulaniarnissaq. Peqqussutissaq Inatsisartut upernaamut ataatsimiinnissaannut akuersissutigineqaraluarpalluunniit, aammalu qitiusumit piareersarnerit neriunartumik pisarillingaatsiarsimagaluarpataluunniit, atuisussat piareersimanngippata aningaasallu pisariaqartitat tunniunneqanngippata peqqussutissap ukiup tulliani aggustimit atulersinneqarnissaa akisussaaffeqanngitsumik iliuutsitut nalilertariaqarpoq. Aammattaaq erseqqilluinnartumik tunngaviusussaasoq tassaavoq suliffigisartagassat pillugit nutaamik ilinniartitsisut kattuffiata IMAK-ip isumaqatigiissuteqarfigineqarnissaa, tassa peqqussutissap tunngavissarititai malillugit atuarfiit ukiumik atuarfiusussamik nutaamik piareersaalersinnagit, tunngavissarititaasummi taakku massakkut sulinissamut aaqqissuussisarnermit allaanerulluinnarput. Atuarfitsialaap piareersarneqarnera nukippassuarnik atuiffiusimavoq, nukiillu taakku asuliinnartinneqassanngillat peqqussutissap piaarpallaartumik atulersinneqaannarneratigut. Immitsinnut piffissamik tuneriarta Atuarfitsialallu 2003-mi eqquutitivillugu, 2002-mi taamaaliorsinnaanerput pisuusaarutiginiaannarnagu!
Jens Lars Fleischer
siulittaasoq
|
