Kanukoka: Innuttaasut sakkortuumik piumasaat tusaanngitsuusaarneqarsinnaajunnaarpoq

Inatsisartut aningaasarsiatik siumoortumik nalunaarutiginagu qaffammatigit tamatta tupaallatsitaavugut. Maannakkut tamanit inuiaqatigiit tunoqqullugit iliuuseqarneq akuerisinnaanagu tusarliunneqartuarpoq.

Kommuneqarfiit kattuffianni siulersuisuusugut isumaqarpugut naalakkersuisut inuiaat piumasaat tusaanngitsuusaarsinnaajunnaaraat.

Inatsisartut naalakkersuisullu ukiormanna ataatsimiinnermi kommunit sinnerlugit tusarniaassutit akinerini aammalu ataatsimiititaliat sulinerini kommunit sinnerlugit kissaatigisanik pingaartitatsinnik qassiinik apuutsiffigisareernikuuagut. Soorlu apuupparput atuarfitsialak taaguutaannanngussanngippat kommuninut tapiissutit qaffattariaqartut, taamaaliortoqanngippammi aningaasakinnerusut atuartitsinerup pitsaanerulersinnaanissaanut akissaqassanngimmata. Apuupparput naalakkersuisut namminneq anguniagassiarisaat, tassa ukiut 15-it ingerlaneranni atuarfiit illutaasa iluarsaanneqarnissaannut aningaasaliissutit ikilisinneqarnerat naammaginatigu. Oqaatsilli kusanartut akerliannik aningaasaliissutit appartinneqarput. Suliffissuit matoorarneqarniarput akilersinnaasumik ingerlatsinermik taallugu.

Taammaakkaluartorli illoqarfinni suliffissaaruttussanut mandetimet atorlugit aningaasaliisarneq atorunnaarsinneqarpoq.

Inuiaqatigiinni pissakinnerusut puiorlugit kommunillu inuttakinnerusut akissakinnerusullu takunngitsuusaarlugit iliuusersorneq naammagiinnarsinnaajunnaarparput.

Qulaani assersuutitut taaneqartut taakkulu assigisaannik iliuutsit taaneqanngitsut pissutigalugit kommunit tungaannit erseqqissassavarput annilaanngatigigatsigu akissarsiat pillugit isumaqatigiinniarnissat tulliuttut inuiaqatigiit akilersinnaanngisaat innuttaasut tungaanniit piumasarineqalissasut.

Taammattumik kommunit kattuffianniit piumasaraarput innuttaasut piumasaat tusaaneqartariaqalersoq, tassalu inatsisartut naalakkersuisullu imminnut akissarsiatigut qaffaassunnerat atorunnaarsinneqassasoq aammalu inatsisartuvut naalakkersuisuvullu tatigineerummata inatsisartunut qinersineqartariaqalersoq.