|
Kommuneqarfiit kattuffiata siulittaasortaavata Jens Lars Fleischerip qularutiginngilaa kommuneqarfiit ingerlatsiviisa ilaat kommunit killeqarfii akimorlugit ataatsimuulersinneqarsinnaasut innuttaasut qanimut kiffartuunneqarnerat qimanngikkaluarlugu. Qarasaasiatigummi attaveqarnikkut periarfissat nutaat atuutilernerisigut suliassat ilaat ataatsimoorunneqarsinnaalerput qanorluunniit siamasitsigisumik najugaqaraluaraanni. ”Ullumikkut kommunit tamarmik immikkuullarissunik ingerlatsiveqarput, tamannalu akisoqaaq,” Jens Lars Fleischer, 1997-imiit Uummannami borgmesteriusoq, oqarpoq. ”Inuppassuaqarfittut aaqqissuussaavugut, tamannalu qimattariaqalerparput.” Jens Lars Fleischerip assersuutitut taavaa akissarsialerineq. Kommunini minnerusuni akissarsialeriffiit marlunnik sulisoqarsinnaasarput, kommunit annerit amerlanerusunik sulisoqartarlutik. Kommunilli 18-iusut akissarsialeriffii ataatsimuulersissinnaagaanni immaqa akissarsialerisut amerlanerpaamik tallimat pisariaqartinneqassagaluarput. ”Taava aningaasat inuussutissarsiornermut pilersitaqarfiunerusumut atorneqarsinnaassagaluarput,” siulittaasunngortoq taama isumaqarpoq. Assersuutaasinnaasoq alla tassa illoqarfiit aqqusernisa qalliutissaannik asfaltiliortarneq. Inuiaqatigiit aningaasanik sipaagaqangaatsiassagaluarput kommunit suleqatigiillutik aaqqissuussinermikkut asfaltiliortitsisaraluarpata. Suleqatigiinnerunissaq pingaarteqaara ”Taamaattumik pingaarteqaara kommunit killeqarfii akimorlugit suleqatigiinnerunissaq. Tamanna angussagutsigu qarasaasiatigut attaveqarnikkut teknikki nutaaq atorluarniartariaqarparput. Angerlarsimaffinni tamani telefoneqalersimaneratut internetikkut attaveqaateqarneq angerlarsimaffinnut tamanut annguteriaannaavoq. Taavalu pissusissamisuussaaq qarasaasiatigoortumik toqqaannartumik innuttaasunut kiffartuussilernissaq. Innuttaasut paasissutissanik imminnut tunngasunik pisariaqartitaminnillu allanik piumallutik isissutissaq namminneq ilisarnaatigisartik atorlugu kommunip allaffianut toqqaannartumik attaveqarsinnaalissagaluarput.” ”Qanittumik oqartussaaqataanermut iluaqutaannginnerami kommunimi sulisut ornillugit attaveqarfigisinnaanissaat?” ”Soorunami qanimut attaveqarsinnaaneq pingaaruteqarpoq. Attaveqarnikkulli periarfissat nutaat iluamik atoraanni qanimut oqartussaaqataaneq akornuserneqarnavianngilaq. Eqqarsariartaatsit sungiutiinnakkat qimanneqartariaqarput atortorissaarutit nutaat iluaqutigilluassagaanni. Kommuneqarfiilli nammineersinnaatitaanerat innimigisassaavoq. Taamaattumik kommunit qanoq isumaqarnerat apeqqutaajumaarpoq suliassaqarfiit suut ataatsimoorussamik ingerlanneqarnissaannik aalajangerniarnissami,” Jens Lars Fleischer naggasiivoq.
Jens Lars Fleischer |
