|
Aasap ullui ilaatigut nuannisaarfittut pingaarnerusumilli nukissanik inuussutissanillu katersuiffittut atorluarniagassaammata matumuuna juunip 21-ani inuiattut ullorsiorneq iluatsillugu innuttaasunut, aalisakkanik tunisassiornermik ingerlatsivinnut naalakkersuinikkullu aalajangiisartunut kajumissaataasunik tinnersaataasunillu oqaaseqarusuppunga nunatta pissarititaanik atorluaaniarnissaq pingaartillugu. Siullermik, innuttaasunut kajumissaarutigerusunnarpoq inuutissarsiornikkut sulinikkullu periarfissat aasap nassatarisartagai atorluarniaqqullugit asiutinnaveersaaqqullugillu. Aalisakkerivinni tunisisoqarlualersillugu sulisussaaleqilertarneq nunatta pissarititaanik atorluaanissaq pineqartillugu naleqqutinngitsorujussuuvoq – aammami aalisakkeriviit ilaat ingerlatsinerminnik pissutsinut naleqqussaasalereermata soorlu apersortitsinerit nalaanni suliaminnik annikillisitsisarlutik. Aappassaanik, aalisakkanik suliffinnut naalakkersuinikkullu aalajangiisartunut piumarisariaqarpoq pisuussutinik atorluaanissaq siunertaralugu eqaatsumik innuttaasunullu kajumissinartumik aaqqiiniartaqqullugit. Aalisakkanik tunisassiorfiit qerititsiviillu kusanartut atorneqaratik napaannalertarnerat aalisartunut innuttaasunullu allanut nikallornarlunilu akunnattuungalersitsisarpoq – nalunngikkaanni tunisassiarineqarsinnaasunik aalisagaqarluaraluartoq. Imminut piumaffigineq, suleqatiginnikkusussuseqarneq eqaatsumillu aaqqeeriarsinnaaneq tamanit – tassa aalisartunit, sulisartunit, suliffissuarnik ingerlatsisunit naalakkersuinikkullu oqartussanit – atorfissaqartinneqaqaat nunatta pissarititai pitsaanerpaamik iluaqutigissagutsigit. Tassami inuutissarsiornikkut aningaasarsiornikkullu tunngavissat qajannaallisarnissaat apeqqutaalluinnarpoq siunertavut nuannersut, soorlu Atuarfitsialak namminersulernissarlu, iluamik anguneqassappata.
Inuiattut ullorsiorluarnissamik aasarsiorluarnissamillu kissaassillunga
Jens Lars Fleischer
Kanukoka-mi siulittaasoq
|
