|
Siulersuisut aalajangernerminni ukiormannamut ataatsimoortumik tapiissutit pillugu isumaqatigiissummi inissiinermi akiliutip angissusissaa isumaqatigiissutinut ilaareersoq innersuussutigaat. Isumaqatigiissutillu oqaasertai imaattut: “Illuatungeriit aammattaaq isumaqatigiissutigaat - 1998-imi isumaqatigiissutaareersutut - Isumaginninnermut Pisortaqarfiup KANUKOKA-llu akornanni suleqatigiittoqassasoq, illuatungeriit tamakkiisumik suliaq pillugu ilisimatinneqartarnissaat qulakkeerniarlugu, paaqqinnittarfiit ineriartortinneqarnerisa inatsisit malillugit oqimaaqatigiissuunissaat qulakkeerniarlugu, perorsaariaatsimi killigeqqusap illersorneqarsinnaanera, kommunit pisariaqartitaat aningaasatigullu piginnaasaat eqqarsaatigalugit. Aammattaaq illuatungeriit isumaqatigiissutigaat ukioq naatsorsuiffiusup ingerlanerani Namminersornerullutik Oqartussat KANUKOKA-llu akornanni ulloq unnuarlu akiusup a-conto-p annikillisinneqarsinnaanera periarfissinneqassasoq. Taamatut isumaqatigiissusioqqinnermi naatsorsuutigineqarpoq suleqatigiinneq taaneqartoq piviusunngortinneqarnissaa, taamaalilluni KANUKOKA 2002-mut pilersaarusiornermi peqataaniassammat.” Ukiumut 2002-mut ingerlatsinermut missingersuusiornermi KANUKOKA ilaatinneqanngilaq taamaattumillu ukiup qeqqinnaani akiliutit allanngortinneqarsinnaanissaannut piumasaasut piviusunngortinneqarnikuunngillat. Aningaasaqarnermullu naalakkersuisup tamanna akuersaarlugu KANUKOKA-mi aallartitat ataatsimiineranni nalunaarutigereerpaa, imatut oqalugiarnermini: “Ulloq unnuarlu paaqqinnittarfinni aamma annertuumik ajornar-torsiuteqartoqarpoq, aaqqiivigineqarnissaannik pisariaqartitsisunik. Siullertut ulloq unnuarlu paaqqinnittarfiit amerlanerusut pisariaqartinneqarput, meeqqat inuusuttullu ajornartorsiutillit pisariaqartitaat naammassisinnaajumallugit. Appaattut ulloq unnuarlu paaqqinnittarfiit aningaasatigut ajornartorsiutaat aaqqinniarlugit ujartuisariaqarpugut. Nuna tamakkerlugu kattuffiup Namminersornerullutillu Oqartussat akornanni suleqatigiinneq pitsaasoq pilersinneqarsimasoq annertuumik isumalluarfigaarput. Nuna tamakkerlugu meeqqanut inuusuttunullu ulloq unnuarlu paaqqinnittarfiit Namminersornerullutik Oqartussanit aqunneqarput, tamatumunnga aningaasartuutit kommuninit aningaasalersorneqarput. Ulloq unnuarlu paaqqinnittarfinnut aningaasa-liissutinut sinaakkutit ataatsimut tapiissutit isumaqatigiinniutiginerini Namminersornerullutik Oqartussat Kanukoka-llu akornanni aalajangerneqartarput. Ataatsimut tapiissutit ukiumut ataasiarluni isumaqatigiinniutigineqartarmata pineqartumut 2001-imi aamma 2002-mut amerlanerusunik aningaasa-liisoqarnissaa periarfissaqanngilaq. Ukiup naatsorsuusiorfiusup ingerlanerani ulloq unnuarlu paaqqinninnernut akinut akiliuteqartarnerup annertussusaanut isumaqatigiissusioqqinnissamut periarfissaq ammaanneqarpoq, periarfissaq taanna 2003-imi aningaasaliinissami aatsaat atuutilersinneqarsinnaavoq. Ukiuni arlaqarlersuni missingersuutinik qaangiisoqartarsimavoq, 2001-imilu qaangiinerit 15 mio. kr.-nit angusimavaat. Isumaliutiginissaanut pissutissaqa-lersippaatigut suliap agguataarneqarnera aningaasallu agguarneqarnerat pitsaasumik ingerlanersut. Naalakkersuisuniit piareersimavugut allanngor-titerinissamik eqqarsaatersuuteqarnissatsinnut.” Kattuffiup siulersuisuisa erseqqissarpaat qulaani taaneqartut saniatigut kommunit pisussaammata aningaasanut karsimiititaqarnissamut aalajangersakkat eqqortissallugit. Siulersuisut aningaasaqarnermut naalakkersuisoq allaffigaat isumaqatigiinniartarnermut isumaqatigiinniartarnerit malinneqarnissaat isumageqqullugu. Siulersuisuttaaq aningaasaqarnermi naalakkersuisoq piumaffigaat suleqatigiissitap pilersinneqarsimasup sunarpiarlu pissutigalugu aningaasanik atuivallaarsimanermik qulaajaasussap sulisinneqarnissaa isumageqqullugu. Siulersuisut erseqqissarpaat ataatsimoortumik tapiissutissanik isumaqatigiinniartarneq maannamut kommunit tungaanniit ataqqineqartoq suliap uuma ingerlanneqarneranit ataqqinaassusiiagaammat. Maannamut kommunit ukiumut tullermut missingersuusiornermi isumaqatigiissutaasartut malinneqarnissaat naatsorsuutigalugit suliaqartarnikuugaluarput. Siulersuisut annilaangatigaat isumaqatigiinniartarnerit maannamiit tutsuvigineqarunnaartinneqarsinnaanerat
Jens Lars Fleischer
Siulittaasoq
|
