|
Inatsisartut nutaat ataatsimut isigalugit inuiaqatigiinnut iluaqutaasumik suleqatiginissaat Kalaallit Nunaanni kommuneqarfiit kattuffiata kissaatigaa – qinigaasullu tamaasa pilluaqquavut. Aammami naalakkersuisooqatigiilersussat sulissutissaminnik isumaqatigiissutaat arlalitsigut kommuneqarfiit kattuffiata anguniagaanut naapertuummata naammassisaqarfiulluartumik suleqatiginissaat qilanaarnarpoq. Pingaartumik inuutissarsiutinik ineriartortitsinermi nunap immikkoortukkuutaartumik ineriartortitsinissamik, allaffissornikkut periaatsit ingerlatseqatigiinnerulernikkut pisariillisarneqarnissaannik najugarisanilu oqartussaaqataanerup nukittorsarneqarnissaanik kissaatigisavut naalakkersuisooqatigiilersussat isumaqatigiissutaanni ilisarnarput. Minnerunngitsumillu isumaginninnermi iluarsisariallit, soorlu ulloq unnuarlu meeqqanik inuusuttuaqqanillu paaqqinnittarfiit ajornartorsiutaasartut, kommunit peqatigalugit piaarnerpaamik aaqqinniarneqarumanerat maluginiarnarpoq. Kommuneqarfiit kattuffiat kajumilluni peqataarusuppoq Kalaallit Nunaanni pissutsit atuuttut aallaavigalugit inuiaqatigiillu sorlaqarfigisavut ataqqillugit suleriaqqinnissamut. Pissutsit maanga killinneranni pisariaqartinngilavut aserorsaataasumik nikassaanerit, pisariaqartilluguli naalakkersuisunngortussat qinersisartunik amerlanerussuteqartunik tunuliaqutallit ineriartuutaasumik suleqatiginissaat.
Inussiarnersumik
Jens Lars Fleischer siulittaasoq |
