|
Nunaqarfiit ataatsimut isigalugit inuutissarsiutit tungaasigut qanoq pineqarnissaannik qitiusumit kommunit peqatigalugit isummernissamut maanna piffissanngortoq Kanukokap inuutissarsiutinik siuarsaanissaq pillugu suleqatigiissitaa isumaqarpoq. Apeqqut pingaartoq unaavoq: Nunatsinni nunaqarfiit amerlaqisut qanoq-una siunissaqartinniarivut? Kommuneqarfiit Kattuffiata kommunini inuutissarsiutinik siuarsaanissaq pillugu suleqatigiissitaata ulluni juunip 3-ianiit 8-iata tungaanut Kommuneqarfik Upernavik tikeraarpaa ataatsimiigiarfigalugu. Kommunimi nunaqarfiit ilaat Kangersuatsiaq aamma tikeraarneqarpoq, tassanilu inuutissarsiutit pillugit Nunaqarfiup Aqutsisuinik nassuiaassiffiusumik ataatsimeeqateqarluni. Kommuneqarfiup Upernaviup qinikkatut sinniisuisa nassuiaataat suleqatigiissitap paasisaqarfigeqai, aammalu suliffeqarfinnut pulaarnerminni paasissutissat annikigisassaanngitsut pissarsiaralugit. Suleqatigiissitap pasisaasa ilagaat qaleralinniarluni aalisarnermi tunisassiornermilu pissutsit kommunip innuttaasullu tungaannit naammagineqanngilluinnarnerat. Assersuutitut nunaqarfik tikeraarneqartoq Kangersuatsiaq ukiut arlerlugit tunisassiorfigineqarsinnaasimanngilaq, naak pitsaasumik tunisassiorfeqaraluartoq aammalu qerititsivigissaaraluartoq. Paasineqarpoq nunaqarfik taanna kisiartaanani taama inissisimasoq tamannalu susassasaqartunut oqaatigineqartarsimagaluartoq, kinguneqanngitsumili. Taamaattumik suleqatigiissitap ilungersorluni naalakkersuisunut susassaqartunullu allanut kaammattuutigaa piaartumik iliuuseqaqqullugit. Tamannami innuttaasut pisariaqartilluinnarmassuk inuttut naleqassuseq suli annerusumik annaajartussanngikkunikku. Suleqatigiissitap pingaartippaa ilaatigut kommunit isorliunerusut tikillugit inuutissarsiutitigut qanoq ingerlanerat paasisassarsiorfigiitigalugu ataatsimiiffigissallugit, aamma kommunimi tikitaminni qinikkat peqatigalugit. Kommunit sanileriit suleqatigiinnissaat suleqatigiissitap aamma pingaartitarimmagu Qaanaap Uummannallu sinniisaannik ataatsimiinnermut qaaqqusisoqarsimavoq, taamaalillutik sanileriit inuutissarsiutitigut suleqatigiiffigisinnaasaminnik nalilersueqatigiinnissaminnut periarfissaqarniassammata. Ajoraluartumik Uummannaq peqataatitaqanngitsoorpoq angalaniarnikkut akunnattoorutit pissutigalugit. Suleqatigiissitaq pilersinneqarsimavoq kommunit inuutissarsiutinik siuarsaaniarneranni aammalu kommunit nunap immikkoortuini inuutissarsiutinik pilersitsisinnaasunik suliniuteqarneranni ikorfartuisussatut aammalu ataqatigiissaariniartussatut najumminnittuuniartussatullu. Suleqatigiissitaq ukuninnga inuttaqarpoq: Kanukoka-p siulittaasua Jens Lars Fleischer (suleqatigiissitami siulittaasuusoq), Aasiaat borgmesteriat Knud Sørensen, Sisimiut borgmesteriat Hermann Berthelsen, Narsap borgmesteria Jørgen Lund aammalu kommunaldirektørit peqatigiiffiat sinnerlugu ilaasortaasoq Jørgen Vetterlain, Maniitsoq.
Kanukoka-p kommunini inuutissarsiutit pillugit suleqatigiissitaa sinnerlugu
Jens Lars Fleischer
siulittaasoq Erseqqinnerusunik paasisaqarniaraanni aamma suleqatigiissitami ilaasortat saaffigineqarsinnaapput. |
