Naalakkersuisunut ilaasortap Ole Dorphip ippassaq Qanoruumi apersorneqarluni kommunit pisuutippai Namminersornerullutik Oqartussat ulloq unnuarlu paaqqinnittarfiutaanni aningaasaliissutaasunik sippuisimanermut. Taamaattumik pissusissamisoortuutippara Ole Dorph eqqaasissallugu taassuma pisortaqarfia ulloq unnuarlu paaqqinnittarfiit ingerlanneqarnerannut akisussaammat atuivallaarsimanermullu pisortaqarfik taanna kisimi pisuutinneqarsinnaalluni.
Ole Dorphip oqaasii ugguuna ilumoortortaqarput paaqqinnittarfiit ingerlanneqarneri kommuninit aningaasalersugaammata. Tamannali ima paasineqassanngilaq budgetit aalajangiunneqarsimasut sipporlugit atuisoqarpat kommunit matussutissiissasut.
Ingerlatsinermi aningaasartuutit affaat kommunit siumoortumik akilertarpaat, taakkulu ataatsimoortumik tapiissutinit ilanngaatigineqartarput. Aningaasartuutit affaat inissiinermut akiliutitigut akilerneqartarput. Taakkulu qanoq atsigissanersut isumaginninnermut pisortaqarfiup ingerlatsinermut ukiumoortumik budgetiliornerani aalajangersarneqartarput.
Namminersornerullutik Oqartussat 1998-imili misiliisarsimagaluarput ukiumoortumik atuivallaarutaasartut kommuninut akilersinniarlugit. Kommuneqarfiilli kattuffiata tamanna tamatigut itigartittarsimavaa.
Taamanerniilli Namminersornerullutik Oqartussat neriorsuisarsimapput budgetiliornermi kommuneqarfiit kattuffiat ilaatikkumallugu. Neriorsuulli tamanna eqqortinneqanngilaq, taamaattumillu ukioq manna ataatsimoortumik tapiissutit ulloq unnuarlu paaqqinnittarfinnut tunngasortaat ima oqaasertaqarpoq:
”Illuatungeriit isumaqatigiipput meeqqanik inuusuttunillu paaqqinnittarfiit akinut akissarsianullu siumoortumik siunissami iluarsiivigineqartassasut kommuninut ataatsimoortumik tapiissutinisulli procentitalimmik.
Aamma illuatungeriit isumaqatigiipput 1998-imi ataatsimoortumik tapiissutit pillugit isumaqatigiissut suliassaqarfimmi tamatumani paasissutissanik tamakkiisunik pissarsisarnissamik qularnaarisuusoq malitseqartinneqassasoq. Tamatumuuna qularnaarniarneqarpoq paaqqinnittarfiit ineriartornerisa aammalu inatsisitigut killiliussanut malinnaanissap, perorsaanikkut isumannaatsunik atugassaqartitaanissap, kommunit pisariaqartitaasa aammalu aningaasatigut atugassarititaasut oqimaaqatigiissumik ingerlanissaat. Kiisalu illuatungeriit isumaqatigiipput Namminersornerullutik Oqartussat aammalu Kanukoka ukiup aningaasanut inatsiseqarfiusup ingerlanerani isumaqatigiinniartarneri aqqutigalugit ullormut unnuamullu siumoortumik akiliutaasartumik iluarsiisarnissamut periarfissaqassasoq. Taamatut isumaqatigiinniartoqassappat suleqatigiinneq taaneqartoq piviusunngortinneqarsimasariaqarpoq, taamalu Kanukoka 2002-imut pilersaarusiornermut peqataatinneqassaaq.”
Pisortaqarfiup kommuneqarfiit kattuffiat 2002-mut budgetiliornermut peqataatinngilaa. Taamaattumillu Ole Dorphip inissiinermut akiliutit allanngortinniarsinnaavai aatsaat isumaginninnermut pisortaqarfiup budgetiliornermi kommuneqarfiit kattuffiannik peqataatitsinissani eqqaamasinnaappagu.
