|
Qasigiannguit Kommuniat Kanukokalu peqatigiillutik immikkut ittumik suleqatigiissitaliorniarput illoqarfiup siunissaata qulakkeerneqarnissaanik suliniuteqartussamik. Naalakkersuisullu siulittaasuannut Jonathan Motzfeldtimut saaffiginneqatigiillutik kajumissaaripput Namminersornerullutik Oqartussat suleqatigiissitami peqataaqqullugit. Tamanna pivoq Qasigiannguani kommunalbestyrelse kommuneqarfiillu kattuffiata siulersuisui maajip ulluisa aqqarnganni Qasigiannguani ataatsimeeqatigeereersullu. Naalakkersuisunut saaffiginnissummi oqaatigineqarpoq Qasigiannguit aningaasatigut annertuumik ajornartorsiuteqartut, minnerunngitsumik aalisakkeriviup sivisuumik matoqqatinneqartarneranik pinngorfeqartumik. - Suliffissaaruttartut kommunip ikiortariaqartagai ima amerlisimatigipput kommunip siunertanut allanut aningaasaliisinnaanera killeqalersimalluni. Kommunip ajornartorsiutit atugai angeqimmata tamakku iluarsiniarneqarneranni Namminersornerullutik Oqartussat aqqutissiueqataanissaat pisariaqarluinnarpoq, borgmester Daniel Petersen Kanukokallu siulittaasua Jens Lars Fleischer allapput. Qasigiannguani ineriartorneq ilorraap tungaanut saatsikkumallugu immikkut suliniuteqarniarneq ”Qasigiannguit-projektimik” taaneqarpoq. Anguniagaq siulleq tassa aalisakkeriviup suliassaqartinneqartualernissaa. Aammali sanaartornikkut inuussutissarsiorneq uummarsaqqittariaqarpoq sanaartornermik ingerlataqartut kommunimi nungussanngippata. Ukiunimi arlalinni illoqarfik sanaartorfiusimanngilaq. Naalakkersuisunullu saaffiginnissummi taaneqarpoq piaartumik aningaasaliissuteqartoqartariaqartoq Namminersornerullutik Oqartussat illuutaannik, inissianik atuarfimmillu iluarsaassinissamut.. Aamma illuliassanik nutaanik utoqqarnillu isumaginniffimmik sanasoqarsinnaanera suleqatigiiffissatut tikkuarneqarput. Qasigiannguit kommunianni isumaginninnermut oqartussaaffiup sulisussaqartinniarnera ajornartorsiutit ilagimmassuk oqartussaaffeqarfimmi tassani naleqquttumik suleqatigiiffiusumik alloriarfissanik nutaanik periarfissarsiortoqarnissaa aamma suliassat ilagissavaat. - Pissutsit imaannaanngitsut kommunip atugai pissutigalugit suleqatigiinnerup piaartumik aallarnerneqarnissaa pisariaqarpoq, Daniel Petersen Jens Lars Fleischerilu erseqqissaapput. |
