|
Kommuneqarfiit kattuffianni siulittaasutut ukioq qaangiutilersoq qujassutigalugu innuttaasut tamaasa ukiortaassami matumuuna pilluaqqujumavakka, ukiumi nutaami inerititaqarluarfiusumik suleqatigiinnissarput kissaatigalugu. Qilanaarutigaaralu naalakkersuinikkut suliniutissat pingaartitavut Namminersornerullutik Oqartussat paaseqatigalugit ingerlannissaat. Maanna ukiut nikinneranni sulissutigisassanik pingaaruteqartunik taasaqassagaanni tassaasariaqarput: 1) Kommunit inuussutissarsiutinik siuarsaaqataanissaminnut periarfissarissaarnerulernissaat, 2) nunap immikkoortukkuutaartumik inuussutissarsiutinik piorsaanissap pimoorussamik ingerlanneqalernissaa kiisalu 3) kommunit killeqarfitik akimorlugit allaffeqarfitsigut suleqatigiinnerulernissaat. Nunami inuppassuaqanngitsumi isorartoqisumilu inuiaqatigiit ingerlalluassappata inuussutissarsiornikkullu pisariaqartitat eqaatsumik aaqqiivigineqarsinnaasassappata pingaaruteqarluinnarpoq inatsisiliornerit aaqqissuussinerillu naleqqussartuarnissaat. Kommunit inuussutissarsiornermut tapersersuisinnaasariaqarput pisariaqartinneqarpallu peqataasinnaasariaqarlutik – namminersortunik inangiinissaq pinnagu aamma akuliunnissaannaq pinnagu, kisiannili inuussutissarsiutinik aningaasarsiornermillu ataannartitsinissaq ineriartortitsinissarlu pillugit. Suleqatigiissitaq Kattuffimmi pilersitarput sullisinneqassaaq kommunit inuutissarsiutitigut piorsaaqataanissaat aamma naalakkersuisunut paasitissallugu. Kommunit suleqataanissaannik naalakkersuisut oqaasiinnakkut kissaateqartarnerat tunngavigalugu kommunit inuussutissarsiutitigut pilersaarusiaminnik akuerineqaqqullutik apuussisaraluarput, utaqqilussinnartitaasarlutilli. Inatsisip kommunit inuussutissarsiutitigut akuunissaannik piumasarisanut naleqqutinngitsup allanngortinneqarnissaa naalakkersuisut akuersaartariaqalerpaat. Taamaattumik kissaatiginarluinnarpoq inatsisiliornerit aaqqissuussinerillu iluarsartuunneqarnissaat kommunit inuussutissarsiornermik piorsaaqataalluarsinnaanerulersillugit periataarsinnaanerulersillugillu. Ilaatigut tamanna pimoorussamik sulissutigiumallugu Kalaallit Nunaanni Kommuneqarfiit Kattuffiat suleqatigiissitalioqqammerpoq borgmesterinit kommunaldirektørinillu peqataaffigineqartumik. Suleqatigiissitap suliassaasa pingaartut ilagaattaaq kommunit killeqarfii akimorlugit nunap immikkoortukkuutaartumik inuussutissarsiutinik piorsaanissap suliniutinillu ataqatigiissitsiniarnissap aqqutissiuunnissaa. Nunarsuarput milliartuinnartutut ippoq. Kommunit tamarmik immikkoorniarsinnaanngillat – naak sumiuussutsitsinnik pingaartitsinerput qaffallatsiartaraluartoq sanilitsinnillu qisuariartitsisarluni. Kisiannili kommunit killeqarfii akimorlugit eqqarsarnissaq pisariaqassaaq inuussutissarsiornikkut aningaasarsiornikkullu suliassat angisuut siuninnguatsinniittut naammassisinnaassagutsigit. Kattuffimmiit kommunit killeqarfii akimorlugit suleqatigiinnerujartuaarnissaq pingaartillugu Namminersornerullutik Oqartussat ilaatillugit suleqatigiissitamik immikkut pilersitsivugut allaffeqarfikkuttaaq kommunit suleqatigiinnerulernissaannik piareersaasussamik. Naatsorsuutigaarpullu internetikkut nittartagartaarput ukiup qaangiuttup naajartornerani atulersoq allaffeqarnikkut paasissutisseeqatigiittarnermi suleqatigiinnermilu angorusutatsinni iluaqutaalluarsinnaalissasoq. Inussiarnersumik Jens Lars Fleischer, Kanukoka-mi siulittaasoq |
