|
Atsioqatigiinnermit asseq - una tooruk Aningaasaqarnermut Naalakkersuisup Augusta Salling aamma KANUKOKA-p siulittaasuata Jens Lars Fleischer ullumikkut atsiorpaat 2004-mi kommuninut ataatsimoortumik tapiissutissat pillugit isumaqatigiissut. Isumaqatigiissut pisortat aningaasartuutaasa qaffakkiartornerisa unikaallatsinneqarnissaata pisariaqartinneqarnera aamma kommunit ilaasa aningaasaqarnikkut ajornartorsiuteqarnerat mianeralugit isumaqatigiissutigineqarpoq.
Ataatsimoortumik tapiissutit kommunit isertittagaasa ilagaat amerlasuut, taamaalillutik kommunit 2004-mut missingersuusiornertik aallartissinnaalerpaat.
Ataatsimoortumik tapiissutit 2004-mi 37,7 mio. kr.-inik amerlineqarput 765,1 mio. kr.-ingortillugit. Taakkunannga katillugit 17,3 mio. kr.-it akit akissarsiallu qaffariaataannut iluarsiissutaapput aammalu SIK-mik isumaqatigiissuteqarfiusuni akissarsianut aningaasartuutit amerleriaataannut taarsiissutaallutik.
Taakku saniatigut atuarfeqarfimmut aamma meeqqanut inuusuttunullu tunngasuni aammalu ineqarnermut tapiissutit pillugit siusinnerusukkut isumaqatigiissutit malitsigisaannik kommunit ilanngaatissat ilanngaatigereerlugit 10,4 mio. kr.-it pissarsiaraat.
Kiisalu ineqarnermut tunngasuni inatsisit nutaat aamma sulinngiffeqarneq pillugu inatsimmi allannguutit kingunerisaannik kommunit 10 mio. kr.-it pissarsiaraat. Ilisimatitsissutitut ilanngunneqarpoq isumaqatigiissut atsiorneqarsimasoq.
Paasissutissat sukumiinerusut pillugit attavigineqarsinnaavoq aningaasaqarnermut pisortaq Peter Beck, Namminersornerullutik Oqartussat, telefonikkut 34 52 01 imaluunniit pisortaq Martha Labansen, KANUKOKA, telefonikkut 32 21 00. |
