|
Batteriikunik katersuinermi atortussat Nuummiit apriilip 22-ani nassiunneqartut ajoraluartumik kommunit ilaannaannut anngussimapput. Sapaatip-akunnerata kingulliup naalernerani paasivarput kommunit 18-iusut ilaanni arfineq-pingasuni batteriikunik katersuiffissanik inissiisoqarlunilu allagartanik nivinngaassuisoqarsimasoq aammalu naqitaaqqanik paasisitsiniutinik bibliotekinut pisiniarfinnullu inissiisoqarsimalluni. Taamaalilluni suliniut ”Batteriit tunniutikkit” maanna ilaannakuugallartumik aallartippoq. Batteriikunik katersuinissamut kajumissaarineq suliniutip ”Kommunini Avatangiisit”-nik taaguuteqartup ilagaa – kommuneqarfiit kattuffiat KANUKOKA suliniummik ingerlatsisuulluni, Danmarkimi avatangiisinut pisortaqarfik Namminersornerullutillu Oqartussat aningaasaliisoralugit. Paasisitsiniaanikkut innuttaasut kajumissaarneqassapput batteriikunik tunniussisarnissaannut, tamakku kommunip sulisuinit immikkoortiterneqartassammata. Paasisitsiniaanermi atortut ilagaat naqitaaraq saffiugassat avatangiisinut navianartut pillugit eqquiniaasitsinermik ilaatigut imaqartoq. Tassani allassimavoq eqquiniaanermi batteriinik immiissutinik eqqugassartaqartumi akissutit nassiunnissaannut kingusinnerpaamik piffissarititaasoq 1. juuni. Kinguartoornerli pissutigalugu akissutinik nassiussinissap killinga taanna 1. juulimut kinguartinneqarpoq. Batteriikunik katersuineq pillugu paasissutissat uani pineqarsinnaapput: www.kanukoka.gl/batterii
Inussiarnersumik |
