|
Kalaallit Nunaanni kommuneqarfiit kattuffiat kommunini teknikkeqarfiit atortussaannik nassiusseqqammerpoq taamaalilluni batteriit atornikut tamaasa (avatangiisinut navianarpata naviananngippataluunniit) tunniukkiartortaqqullugit inunnut kajumissaarineq aallartissinnaaniassammat. Tamatumani pingaarnertut siunertaavoq saffiugassanik oqimaatsunik (arrortikkuminaatsunik) taaneqartartunik najugarisatsinni mingutsitsinaveersaarnissaq. Siunertallu aapparaa batteriit katersorneqartut eqqaavissuarmut igikkiartuinnarneqartarnerannik taamalu katersornagit igiinnaraanni ajunnginneruneranik isumaliortarnerup eqqortuunnginnerata erseqqissarnissaa. Ajornakusoorpormi takussallugu suut navianartuunersut suullu navianannginnersut. Soorlu batteriiaqqat attataasat mikeqimmata navianarpasigatillu angerlarsimaffimmi eqqaavimmut igiinnarneqartarunarput. Tassa tamakku nalunaaqqutaaqqat, tusartaatit, kisitsissutit kiisalu pinngussat tamalaat batteriivi. Batteriiaqqalli tamakkorpiaat ikuallaavinnut eqqaavissuarnulluunniit igiinnagassaanngivipput saffiugassamik arrortikkuminaatsumik kviksølvimik akoqaramik. KANUKOKA kommunini immikkoortiterinermut ilitsersuusiortitsisimavoq aammalu pikkorissartitsisarnissamik neqerooruteqarluni. Kommunini eqqakkanik immikkoortiterisunut ilitsersuusiat tassaapput allagartarsuaq batteriit assigiinngitsut nalunaarsorsimaffiat kiisalu quppersagaq ilisimasassanik sukumiinerusunik imalik. Innuttaasunik paasisitsiaanermut atortussiat tassaapput allagartat batteriinik katersuivinni nivinngagassat naqitaaqqallu agguaatassat katersuiviit eqqaanniititassat. Nipitittagaliortoqarsimavoq ilioraavinnut nipititassanik. Upernaap ingerlanerani TV-kkut kajumissaarutinik allagartaliisoqartassaaq aammalu paasisitsiniaanerup tunuliaqutaa pillugu radiukkut aallakaatitsisoqassalluni. Aammattaaq eqqugassartalimmik nalorsitsaarinikkut inuit peqataatinniarneqassapput naqitaaraq KANUKOKA-llu internetikkut nittartagaa atorlugit. Akissarsiassat: Batteriinik immiissutit batteriillu immigassat avatangiisinut naleqqussakkat! Batteriit pillugit paasisitsiniaaneq suliniummut ”Kommunini avatangiisinut” ilaavoq. Suliniut taanna Danmarkimi Miljøstyrelsep nunatsinnilu Avatangiisinut Pinngortitamullu Pisortaqarfiup aningaasatigut tapersersuineratigut ingerlanneqarpoq. Paasissutissat erseqqinnerusut uani pineqarsinnaapput: www.kanukoka.gl/batterii
Inussiarnersumik |
