|
Marlunngornermi 28. oktobari 2003 radioaviisimi oqaatsinik paasissutissanillu issuarneqarnera ilisariuminaatsippara. Pingaartumik qallunaatuuani kommuninik kattussuiniaannavissutut saqqummiunneqarpunga, naak erseqqissarniarsimagaluariga KANUKOKA borgmesterillu isummereersimasut siunissami kommunit qanoq aaqqissuussaanissaat pillugu qulaaniit naalakkerneqarumanatik. Radioaviisimi nalunaarutigineqarpoq ’pingaartumik kommunit kattussuunneqarnissaata kingunerisassaanik nalilersuisussanik’ Namminersornerullutik Oqartussat KANUKOKA-lu suleqatigiissitaliorsimasut. Eqqortoq unaavoq: Namminersornerullutik Oqartussat KANUKOKA-lu suleqatigiissitaliorsimapput Kommunit aaqqissuussaanerat pillugu kommissioniliornissamut piareersaasussanik. Kommissionip kommuninik kattussuisinnaaneq kisiat sammissanngilaa. Kommissioni pissutsit ataatsimut isigalugit pisortat ingerlatsiviini nammagassanik suliassanillu agguataarinermi aaqqissuussinerit allanngortinneqarnissaannut periarfissat assigiinngitsut pitsaaqutigisinnaasaannik ajoqutigisinnaasaannillu nalilersuissaaq – soorlu aamma kommunit qanoq angitigisariaqarnerat eqqarsaatigalugu. Kommunit aaqqissuussaanerat pillugu upernaaq oqallissaarutitut saqqummiussanni allappunga kommuneqarfiit kattuffianni siulittaasutut soorunami aaqqiissutissamut aalajangersimasumut pituttoreerniarnanga. Kisiannili oqallittoqarlualerniassammat kommuninut anngajaarsuarnut kattussuisinnaanermik isuma periarfissat ilaattut saqqummiuppara. Tamatuma kingorna oqallinneq qujanartumik annerulerpoq tamatigoornerulerlunilu, siunertaq naapertorluinnarlugu.
Inussiarnersumik |
