|
Nuuk, ulloq 18. aggusti 2003 Isumaliutissiissummik naliliineq Isumaliutissiissutip sukumiisumik tunngavilersorluagaasumillu suliaanera maluginiarnarpoq. Pingaarnerpaamillu: Namminersulernissaq piviusorsiortumik – imaappoq tusarnersaagaanngitsumik – sammineqarpoq, namminersorneq imaqarluartoq anguneqassappat suut inuiaat iluanni sulissutigisariaqarnerat iluarsisariaqarnerallu ersersinneqarlutik. Isumaliutissiissutip kommuninut tunngasortaasa – ilaatigut ukiut arfinillit ingerlaneranni kommuneqarnerup aaqqissuuteqqinneqarnissaanik isumaliutinik imaqartut – kommuninit soqutigineqarlutik oqalliseqataaffigilluarneqarnissaat kaammattuutigerusunnarpoq. Namminersulernissaq pillugu isumaliutit Kommunini inuit najorlugit suliniarnermi ilumoortoq saqqummertuartartoq tassaavoq nammineersinnaanerup inummut peqqinnartuunera – tassa ilatsiinnarani nammineerluni iliuuseqarsinnaaneq utaqqiinnaranilu aaqqiissutissarsiorsinnaaneq suleqatissarsiorsinnaanerlu. Taamaattumik inuiattut namminersornissamik suliniut maanna tunngavilersorneqartoq kommunit tungaannit isigalugu pissusissamisoorpoq tapersersornarlunilu. Nammineersinnaaneq ”namminissarsiornermut” paarlaanneqanngikkilitoq – taanna allarluinnaammat suleqatigiinnermut nammaqatigiinnermullu aserorsaataasoq. Iluarusunnarpoq Namminersorneq Pillugu Isumalioqatigiissitat isumaliutissiissutaanni ersersinneqartuarmat namminersorneq toqqammaveqartariaqartoq innuttaaqataasut kissaatigisaannik, piumassusiannik iliuuseqarsinnaassusiannillu. Tassa imaappoq namminersornermut isumaqarluartumik qajannaatsumillu ingerlanneqartumut sukaassapput nunap immikkoortui (imaappoq kommunit) ingerlalluartut – nunallu immikkoortui taakku ingerlalluassappata aamma sukaassallutik innuttaaqataasut eqeersimaartut ilaqutariillu nukittuut. Kommunit ingerlalluassappata – taamaalillutillu inuiaqatigiit namminersornerannut sukatut tunngaviulluassappata – pisariaqartut aammattaaq Namminersorneq Pillugu Isumalioqatigiissitat isumaliutissiissutaanni taagorneqartut innersuussutigalugit iliuuseqarfigisassat angisuut pingasut matumuuna taaneqassapput: Atuartitaanerup ilinniartitaanerullu nukittorsarneqarnissaat, inuussutissarsiornerup uummarissarneqarnissaa allaffissornerullu pisariillisarneqarnissaa. Inuussutissarsiorneq eqqarsaatigalugu nukiit katersorneqarlik aaqqissuussinerillu pisoqalisut kigaalaqutaasullu piiarneqarlutik. Inuussutissarsiornermut akisussaaneq nunap immikkoortuinut siammarneqarli utaqqisaqattaanneq qitiusumiillu oqartussanut utaqqiinnaqqajaaneq qaangerneqarniassammat. Illoqarfiit, nunaqarfiit suliniutillu aningaasanik pilersitsiviusinnaasut nangartarnagit akuersorneqarlik peqatigiilluarnerup (imaluunniit nammaqatigiinnerup) aqqani allanik ilorraap tungaanut kalitarinnissinnaaniassammata. Inuussutissarsiornerup siuarsarnissaa pillugu ataatsimut kivitseriarnissaq tamanna pisariaqarpoq illoqarfiit nunaqarfiillu ”killeqarfii” maannamut atuuttut akimorlugit. Allaffissornermi aaqqissuussinerit oqimaatsut qerattartoorsimasullu aaqqissuussinernik nutaanik taarserneqarlik. Allaffissornermi suleqatigiinnerulertoqarli ataqatigiissaarisoqarlunilu. Namminersornerullutik Oqartussat kommunillu ataatsimoorussamik pilersaarusiorlik atortorisatigut periarfissat sulisullu pisinnaassusii atorluarneqarnerusinnaaqqullugit. Soorlumi Kaassassuk pinngussanik ”alliseequtiminik” piiaanermigut pissarsuanngorsimasoq, taamattaaq uagut aaqqissuussinernik kigaalaqutaasunik piiaanitsigut nukivut pitsaanerusumik atorsinnaalertariaqarpavut – innuttaaqatigiit toqqissisimasumik ingerlanissaannut namminersornermillu peqqinnartumik angusaqarniarnissamut. Suliniutit angisuut pingaartullu qatangiinnaqqunagit pingaarluinnarpoq piffissalersuisoqarnissaa periaasissanillu aalajangersaasoqarnissaa – nunap immikkoortukkuutaartumik inuussutissarsiornikkut siuarsaanissamut, allaffissornikkut pisariillisaanissamut kommuninillu kattussuinissamut. Taamaaliornikkut namminersornerup isumaqarluartup tamatta kissaatigisatta qajannaatsumik tunngavilersorneqarnissaa qulakkeerniassavarput – soorunami inuit qanimut oqartussaaqataanerat kommunitigut qulakkeerneqarsimasoq mianeralugu. Inussiarnersumik
Jens Lars Fleischer Oqaaseqaatit allat takorusukkukkit una tooruk (Namminersornerullutik Oqartussat nittartagaat) |
