|
Taama isumaqatigiissuteqartoqarpoq Namminersornerullutik Oqartussat taamatullu kommunit isertitaasa amerliartorunnaassangatinneqarnerat nalerorlugu.
Ataatsimoortumik tapiissutit 2005-imi 17,8 mio. kr.-nik amerleriarlutik 798,1 mio. kr. -iussapput. Illua'tungeriit isumaqatigiipput ukiuni 2005-imiit 2009-mut katillugit 85,0 mio. kr.-it eqqakkat kuuffiisa iluarsartorneqarnissaannut atugassatut immikkoortinniarlugit. Taamaattumik ataatsimoortumik tapiissutit 2005-imi aammalu 2006-imiit 2009 ilanngullugu ukiumut 17,0 mio. kr.-nik amerlineqarput. Namminersornerullutik Oqartussat 2003-miit 2005-imut ulloq unnuarlu paaqqinnittarfinni meeqqanut inuusuttunullu inissat 32-inik amerliniarpaat. Taamaattumik paaqqinnittarfiit aningaasassaat ilaatigut tamanna peqqutigalugu 2005-imi 26,2 mio. kr.-nik amerlineqarput, taakkulu affaat kommunit akilerpaat ataatsimoortumik tapiissutit 13,1 mio. kr.-nik ikilineqarnerisigut, affaasalu arlaat akigititanik akiliisitsisarnikkut matussuserneqassapput. Innarluutillit ikiorneqarnerannut pisortat aningaasartuutigisartagaat 1998-imiit 2003-mut misinnartumik amerliartorsimapput. Illua'tungeriit isumaqatigiipput innarluutilinnik sullissinerup tungaatigut aningaasartuutit qaffannerannut pissutaasoq sunaanersoq paasiniarlugu misissuiniarlutik, aammalu innarluutilinnik sullissinerup tungaatigut siunissami aningaasartuutit qaffakkiartornerisa kigaallassutigisinnaasaannik nutaamik aaqqissuussinissaq pillugu siunnersuusiorniarlutik. Naalakkersuisut siunnersuutigaat kommunit naalakkersuisullu suleqatigiillutik aningaasanik, ilinniartitsinikkut, suliffitsigut inuussutissarsiutitigullu suliniutit annertusissutissaannik, atugassanngortitsiniarlutik. Naalakkersuisut kommunillu isumaqatigiipput tamatuma oqaluuserineqarnissaa borgmesterit kommunaldirektørillu Uummannami septembarimi 2004 ataatsimiinnissaanni aallartinniarlugu, 2006-imut ataatsimoortumik tapiissutissat isumaqatigiinniutigineqalerumaarnissaat siunnerfigalugu. Isumaqatigiissut taassumunngalu ilanngussat - una tooruk Josef Motzfeldt, Aningaasaqarnermut Naalakkersuisoq
Jens Lars Fleischer, Kalaallit Nunaanni Kommuneqarfiit Annertunerusumik paasisaqarumagaanni Aningaasaqarnermut Pisortaq Peter Beck, oqaarasuaat 34 52 01-imut, imaluunniit pisortaq Martha Labansen, oqarasuaat 32 21 00-imut, attavigineqarsinnaapput.
|
