|
Kangerlussuaq, 24. marsi 2004
Borgmesterit 14-it oqaaseqaataat
Naalakkersuisut nunatsinni akileraariaatsimik nutaamik eqqussinissaq kiisalu akitigut nammaqatigiikkunnaarnissaq pillugit oqariartuuteqarnerat aallaavigalugu kommuneqarfiit uku: Ammassallup, Nanortaliup, Qaqortup, Narsap, Paamiut, Maniitsup, Kangaatsiap, Aasiaat, Qeqertarsuup, Ilulissat, Uummannap, Upernaviup, Avanersuup Ittoqqortoormiullu borgmesterii ataatsimeeqatigeereerlutik imatut oqaaseqaateqarput:
-
Akileraariaatsimik nutaamik atuutsitsilernerup kinguneranik kommunit amerlanerpaartaanni akileraarutitigut isertitarineqartartut annertuumik ikilissapput. Akileraariaatsikkummi nutaakkut siunertarineqartoq, tassalu isertitakinnerusut akileraarutikinnerulerneratigut aningaasat annaasassat, isertitaqqortunerusut akileraarnerulissutaasigut matussuserneqartarnissaat, minnerunngitsumik kommunini isorliunerusunik taaneqartartuni, kommuninilu innuttakinnerusuni piviusunngortinneqarsinnaanngereermat, pineqartuni isertitaqqortuunik taaneqarsinnaasunik aallerfissaqannginnera pissutigalugu.
-
Kommunini akileraarutitigut isertitakinnerulerfiusuni, innutaasunik sulissinerup ajorseriannginnissaa qulakkeerniarlugu, kommunimut akileraarummik, nuna tamakkerlugu akileraarummik qaffaassutip saniatigut, qaffaasariaqalernissaq sanioqqunneqasinnaajunnaassaaq. Tamannalu akileraarutikinnerusut, ullumerniit akileraarnerusariaqalernissaannik kinguneqanngitsoorsinnaanngilaq.
-
Assigiimmik akeqartitsinerup atorunnaarsinneqarnerata kingunerisaanik illoqarfiit mikinerusut, nunaqarfiillu, inuerukkiartulernissaat, ilaasalu matusariaqalernissaat allaqqussinnaajunnaassaaq. Tamannalu G-60-ip .nunaqarfinnik matooraanermik politikkianit, tassalu pilersaarusiukkamik inuerusaanermiit ajornerungaarpoq, matumanimi sattaaserluni ipitserineq sakkuginiarneqarmat.
-
Eqqaamassavarput G-60-ip politikkianut inuiaqatigiit akerliunerata kingunerisaanik Namminersornerulernerput pilersikkatsigu. Naakkinassaqaagullu ukioq manna Namminersornerulernitsinniit ukiut 25-nngortorsiorfitsinni G-60-p politikkia sakkortusisaq akuersaarlugu eqqutissagutsigu, tamannami politikkimut akerartukkamut ajorsarnermik nassuerutiginninnerummat .
-
Assigiimmik akeqartitsinerup atorunnaarsinneqarnerata kingunerisaatut, illoqarfinni mikinerusuni, nunaqarfinnilu, ineriartorneq suliffissanillu nutaanik pilersitsiortorneq, ullumikkut ajornakusooreeqisoq, unilluinnassaaq. Kiammi aningaasarsiornermik paasisimasaqalaartup, suliffimmillu nutaamik pilersitserusuttup, akikinnerusumik ingerlatsivigisinnaasani ujartunngitsoorsinnaammagu.
-
Illoqarfinni nunaqarfinnilu eqqugaasuni sulisussanik ilinniarluarsimasunik tikisitanik kalaallinillu kiisalu ilinniartitsisunik atorfinitsitsiniarnerit sinnattuinnanngortinneqassapput, inuusuttut ilinniagaqarusuttut periarfissaginnerusunut nutsilernerannik kinguneqartumik.
-
Illoqarfinnut ineriartorfiulersunut nutsernersuaq aqunneqarsinnaanngitsoq pilissaaq. Illoqarfinni pineqartuni ullumikkut inissaqarniarnikkut, suliffissaqartitsiniarnikkullu ajornartorsiorfioreersuni ajornartorsiornerungaalernermik, inuttullu nakkaannernik amiilaarnartunik kinguneqanngitsoortussaanngitsoq.
-
Borgmesterit atsioqatigiit sakkortuumik uparuarniarpaat aningaasaqarnermut naalakkersuisup suliamut tunngati1lugu "KANUKOKA-p akuersaaqataaneranik" oqarnera - suliassaq pillugu aallartitat kisimik aaliangiisinnaammata.
Siuliani taakkartukkagut aallaavigalugit naalakkersuinikkut alloriarnissamik aaliangertoqannginnerani inuiaqatigiinni nalilersueqatigiittoqaqqaarnissaa piumasaraarput. Misissuilluaqqaaranimi piviusunngortitsipallattarnerit kingunerisaannik inuiaqatigiinnut nammatassiissutigineqartartut naammalersorinaleraluarmata.
Vittus Mikaelsen
Nikolaj Ludvigsen
Jørgen Lund
Otto Jeremiassen
Knud Sørensen
Lars Karl Jensen
Anthon Frederiksen
Jakob Petersen
Jens Immanuelsen
Naimanngitsoq Petersen
Siverth Heilmann
Tommy Marø
Lars Sørensen
Andreas Sanimuínaq
Sammisaq pillugu paasissutissanut attaviit:
Aviisi paasissutissiivik: "Aningaasarsiornikkut imminut napatissinnaanermut aqqut"
Naalakkersuisut politikki-aningaasaqarneq pillugu 2004-mut nalunaarutaat pillugu paasissutissiineq. Linki tooraanni aviisi Namminersornerullutik Oqartussat nittartagaanniittoq ammarneqassaaq (aviisi 8-nik quppernilik, pdf, 250 kb).
Naalakkersuisut politikki-aningaasaqarneq pillugu nalunaarutaat, marsi 2004
Linki tooraanni nalunaarut tamaat Namminersornerullutik Oqartussat nittartagaanniittoq ammarneqassaaq (A4 qupp. 68, pdf, 375 kb).
|
