Asiami nunani assigiinngitsuni innuttaasut juullikkuni ajunaarnersuarmit eqqugaanerat tamatta annilaarutigeqisatsinnik tusarparput.

Tusarliunneqartut inuppassuit alianartumik eqqugaanerinik aamma inissiat attaveqaatillu aserugaalluinnarnerinik oqaluttuarput. Aseruasimasut nappaqqinniarlugit suliassarujussuaq tulliuttussaavoq, aammalu nappaatit tuniluuttut ajunaarnersuarmut malittaanissaat pinngitsoortinniarlugit pilertortumik ikiuunnissaq pisariaqartinneqarpoq.

Uagut Kalaallit Nunaanni innuttaasugut ajunaarnermit eqqugaasut toqqaannartumik ikiorsinnaanngikkaluarpavut, kisianni ikiuiniaqatigiiffiit nunani eqqugaasuni innuttaasut ikiorniarlugit suliniarneranni ikiorseeqataasinnaavugut.

Taamaattumik kommunit tamaasa kajumissaarusuppakka aningaasanik katersuiniarnerit nunatsinni tamanut ammasumik ingerlanneqarumaartut tapersersorluaqqullugit. Kommunini sunngiffimmi sammisassaqartitsisuusut siornagut katersuiniartarnerit aqqutigalugit misilittagaqarlualereerput, neriuppungalu katersuiniarluni suliniutit suleqataaffigilluarneqarumaartut.

Inussiarnersumik inuulluaqqusillunga
Jens Lars Fleischer
KANUKOKA-mi siulittaasoq