Batteriit tunniutikkit – pingaartumik immeqqittakkat!

Upernarnerani illoqarfinni nunaqarfinnilu saliinissaq iluatsillugu KANUKOKA kommunillu batteriikunik katersuinissamut kajumissaareqqinnialerput.

2003-mi upernaakkut innuttaasunut kajumissaarut imaappoq: "Batteriit tunniutikkit - batteriit tamaasa kommunip eqqakkanik immikkoortiterivianut tunniussigit". Tamannalu innuttaasut ilarpassuisa malissimavaat. Sulili amigaateqarpoq …

"Batteriikut avatangiisinut navianarluinnartut, tassa sannatit mobiltelefonillu batteriivi immeqqittakkat, immikkoortiterivitsinni qaqutiguinnaq takusarpavut," Uummannami kommuneingeniøri Niels Mønsted oqarpoq. "Nalunngilarput arlaannut ilineqartarsimassasut, takujuarpavummi sulisut batteriitortunik qinneriaatillit, aammalumi mobiltelefoninik atuineq annertoqaaq."

Mobiltelefonit kviksølvimik akoqarput
Ullumikkut kikkut tamangajammik meeqqaniit utoqqarnut mobiltelefoneqarput. Mobiltelefonit batteriivi immeqqittakkat avatangiisinut navianarluinnartunut ilaapput. Batteriit tamakku pitsaanerulersimagaluarput, sivisuumik atorneqarsinnaasarlutik, taamaattumillu igiinnarneqartartut immaqa ikinnerulersimallutik.

Mobiltelefonilli naassaanngitsumik atasinnaanngillat. Igitassanngortissagaannilu eqqaamasariaqarpoq imaanngimmat batteriivi kisimik avatangiisinut navianartuusut. Displayii ("igalaavaraat") kviksølvimik, tassa saffiugassamik arrortikkuminaatsumik peqqinnissamut navianartorujussuarmik, akoqarput. Mobiltelefonit aserorpat batteriikunut ilanngullugu tunniuttariaqarpat.

Batteriiaqqat ajornerpaapput
Aamma nalunaaqutaaqqat, tusartaatit assiliissutillu batteriivi mikisut attataasat kviksølvimik akoqarsinnaapput. Igiinnarneqarajuppallaarpulli mikeqimmata navianaateqarpasigatillu. Kviksølvili toqunartuuvoq inuup sianiutaanut sunniussinnaasoq, taamaattumillu eqqakkanik immikkoortiterivinni tamakku nakkutigeqqissaarneqartarput. Batteriiaqqat attataasat tamaasa kviksølvimik akulittut pineqartarput, tassami immikkoortiterinermik ilinniarsimagaluartulluunniit immikkoortikkuminaatsittarmatigit.

Eqqakkanik tunniussineq akeqassanngilaq
KANUKOKA-p siulittaasua kommuninut kajumissaareqqammerpoq illoqarfinni nunaqarfinnilu tamani batteriikunik tunniussisarfeqarnerup saqqumilaartinneqarnissaa isumageqqullugu. Kommunillu qinnuigai batteriikut avatangiisinut navianartut tunniunneqartarnerat akeqarteqqunagu.

"Eqqakkat avatangiisinut navianartut maangaannaq iginneqaratik eqqortumik passunneqartarnissaat pillugu tunniussisarneq innuttaasunut akeqartariaqanngilaq. Kisianni eqqakkat tamakku immikkoortiterlugillu nassiussuunneqartarnerat kommuninut akisuvoq, taamaattumillu kommunit Namminersornerullutillu Oqartussat paaseqatigiissutigisariaqarpaat eqqagalerineq qanoq aningaasalersorneqarsinnaanersoq”, Jens Lars Fleischer oqarpoq.

Paasisaqarneruniaraanni saaffigineqarsinnaapput KANUKOKA-p direktøria Martha Labansen aamma Suliniummi "Kommunini Avatangiisit"-ni suleqataasoq Kitte Vinter-Jensen - telefon 32 21 00.    

Uanit bateriit, aatsitassat oqimaatsut, kommunit batterinik immikkoortitserisarnerat pillugit paasissutissanik amerlanerusunik aallersinnaavutit avatangiisillu pillugit siunnersorneqarsinnaallutiit.