|
Ukioq nutaaq iserfigaarput Kalaallit Nunaanni Kommuneqarfiit Kattuffiata tungaaniit inuiaqatigiinni suliassanut angisuunut arlalinnut peqataanissamik qilanaarutissaqarluta. Minnerunngitsumik pissanngatigaarput kommunit aaqqissuussaanerannik iluarsaaqqinnissamut piareersaasiulernissaq, 2004-p aallartinnerani ataatsimiititaliamik siunissami pisortat qanoq ingerlatseriaaseqarnissaannik kommunillu qanoq aaqqissuunneqarsinnaanerannik nalilersuisussamik pilersitsinikkut aallartinneqartussaq.
Tassami aaqqissuussaanermik iluarsaaqqinnissaq tamanna inuiaqatigiit ingerlanneqarneranni sorpassuarnut attuumassuteqartussaavoq - allaffissornikkut ingerlatsinermut, innuttaasut najukkaminni oqartussaaqataanerannut innuttaasullu kiffartuunneqarnerannut. Nutaamik aaqqissuussinissaq innuttaasut najugarisaminni aningaasarsiornermik inuussutissarsiornermillu ineriartortitsinissaannut kajumissisitsisuusariaqarpoq, sanaartornerup najukkani pissutsinut naleqqussarneqarnerunissaanut periarfissiisariaqarluni aammalu aalisarnermi piniarnermilu pisuussutit nungusaataanngitsumik iluaqutiginiarneqarnissaannut ataqatigiinnerusumik iliuuseqartarnissamut tunngavissiisariaqarluni. Kommuneqarfiit kattuffiata qilanaarutigaa kommunit inuussutissarsiutitigut ingerlatsisinnaanerannik inatsisitaarnikkut kommunit inuussutissarsiornermik siuarsaaqataasinnaanerulernissaat taamalu aningaasarsiornermut pitsanngorsaaqataasinnaanerulernissaat. Kattuffiup kissaatigaa sanaartornermi akisussaaffiit erseqqinnerulernissaat, taamaalillutik suliassat aningaasanut inatsisikkoortumik akuersissutigineqartut piviusunngortinneqarsinnaasalerniassammata. Paasiuminaatsunik aaqqissuussisarneq suliassat aningaasaliiffigineqarsimasut piviusunngortinngitsoorneqarnerannik kinguneqartartoq kommunit akueriinnarsinnaajunnaarpaat. Silarsuarmi allanngorartuartumi kommunit aaqqissuussaanerannik iluarsaaqqinnissami pingaaruteqarpoq eqqaasitsissutigiuassallugu tamatigut inuk qitiutillugu aaqqissuussisoqartariaqarmat. Inuiaqatigiit demokratiimik tunngaveqartut aaqqissuussaaneranni inuk qitiusussaavoq aammalu inuit qanimut oqartussaaqataanerat isumannaatsumillu sullinneqartussaanerat tunngaviusussaalluni. Taamaattumik allaffissornikkut aaqqissuusseqqinnissaq kommunit Namminersornerullutillu Oqartussat suliassaasa agguataaqqinneqarnissaanni pingaaruteqarluinnartoq inuk inuiaqatigiillu pillugit ingerlanneqarilitoq - aammalu atortorissaarutit nutaat qarasaasiaqarnikkullu periarfissat allaffissornikkut oqilisaanissamut eqaannerusumillu innuttaasunik sullissinissamut atorneqarilittoq. Suliassap tamatuma peqataaffiginissaa qilanaarutigalugu kommuneqarfiit kattuffiat sinnerlugu suleqatigisarsimasavut nunaqqativullu tamaasa ukiortaami pilluaqquavut.
Jens Lars Fleischer |
