|
KANUKOKA-p inuutissarsiornermut suleqatigiissitaa Tasiilami paasisassarsiuutigaluni angalanermini ataatsimeeqqammerpoq. Februaarip 1-ini 2004 ataatsimiinnermini ilaatigut oqaluuserisaminut atatillugu imaattumik saqqummiusserusuppoq:
Namminersornerullutik Oqartussat tunisassiornermut suliffeqarfiutaata NUKA A/S-ip sullissinera pingaartumik nunaqarfiit eqqarsaatigalugit naammaginanngilaq. Nunatta pissarititaanik uumasunik aalisakkanillu tunitsiviisa ingerlalluannginnerat maluginiarneqarpoq aammalu tunisassianik ineriartortitsinera annikippallaartutut nalilerneqarluni. Assersuutigalugu Tasiilap illoqarfiani aalisakkat Kitaaneersut akisoorujussuit pisiniarfinni pisiassaapput naak nunap immikkoortuani tamaani aalisagaqarluaraluartoq. Taamaattumik suleqatigiissitap kaammattuutigaa inuiaqatigiit annertuumik aningaasaliiffigisimasaasa tunisassiorfiit ineriartortinnissaat aammalu suli nunatta pissaritaasa nerisassiat atorluarnerunissaat. Tamatuma saniatigut suleqatigiissitap Greenland Tourism-imut kaammattuutigaa takornariaqartitsineq eqqarsaatigalugu nunaqavissut annerusumik peqataatinneqarnissaat takornariaqarnermi ineriartortitsinermi. Tassa takornarianik angallassisartut eqqarsaatigalugit sumiiffinnilu takornarianik ineriartortitsinermi pilersaarusiornermilu innuttaasut peqataatinneqaluarnissaat ujartorneqarpoq. Suleqatigiissitap aamma tikkuagassatut eqqaavaa nunatta nerisassatigut sumiiffinni pissarititai annertunerusumik neriniartarfinni, hotelini assigisaannilu ullumikkornit annertuneroqisumik atorneqartariaqarnerat. Takornariammi nunap tikitamik nerisassaatai aamma tassuuna ilikkassammatigik. Nunatta pissarititaasa suli annerungaartumik atorneqarnissaat eqqarsaatigalugu inatsisiliornikkut aqqutissiuisoqarsinnaanera suleqatigiissitami eqqartorneqarportaaq. KANUKOKA-p ataani inuutissarsiornermut suleqatigiissitaq ukunannga ilaasortaqarpoq: Siulittaasoq Jens Lars Fleischer (KANUKOKA-p siulittaasua), siulittaasup tullia borgmester Knud Sørensen, Aasiaat, borgmester Hermann Berthelsen, Sisimiut, borgmester Jørgen Lund, Narsaq, aammalu kommunaldirektørit sinnerlugit ilaasortaavoq Jørgen Vetterlain, Maniitsoq.
Suleqatigiissitaq sinnerlugu
Jens Lars Fleischer siulittaasoq |
