|
TOQQISSISIMANEQ ISUMANNAASSUSERLU ISUMAQARLUARTUMIK NAMMINERSORNISSAMUT ATTUUMASSUTEQARPUT Kommunini inuit najorlugit suliniarnitsinni paasiuartagarput tassaavoq nammineersinnaaneq peqqinnartuusoq - tassa ilatsiinnarani nammineerluni inuttut iliuuseqarsinnaaneq utaqqiinnaranilu aaqqiissutissarsiorsinnaaneq suleqatissarsiorsinnaanerlu. Taamaattumik inuiattut namminersornissamik suliniut maanna tunngavilersorneqartoq kommunit tungaannit isigalugu pissusissamisoorpoq tapersersornarlunilu. Taamaattumillu aamma alloriarnissaq tulleq siunniunneqartoq katersuuffigineqartorlu – namminersorneq naalagaaffeqatigiinnerup iluani - tapersersussavarput inuiaqatigiinnilu qajannaatsumik tunngaveqarnissaa pillugu suleqataassalluta. Oqaatigissavara Qallunaat naalagaaffiat nunatta namminersulernissaanut annertuumik pisussaaffeqarmat naammassisariaqarluinnakkaminik. Qularutingineqassanngilaq Nunatta ”Namminersulivinnissaa” naalagaaffitut namminiivitttut assortorneqanngilluinnarmat kisiannili suliamiik suliamut ingerlaarnissarput uagut pingaartipparput peqataaffingissallugulu. Kommunalpolitikeritut misilittakkakka tunngavigalugit oqassaguma inuit nalerisimaarlutillu nuannaartarput pissaqarlutik peqateqarlutillu nammineersinnaatitaagaangamik. Tassa imaappoq inuuniarnikkut toqqissisimaneq isumannaassuserlu isumaqarluartumik namminersornissamut attuumassuteqartorujussuupput. Taamaattumik alloriarnerit ataasiakkaat qajannaatsumik tunngaviliornissaat pingaaruteqartorujussuuvoq. Namminersornerullu qajannaatsup sukarissavai nunap immikkoortui ulluni ajunngitsuni ajortuniluunniit ingerlalluartut, innuttaaqataasut eqeersimaartut ilaqutariillu nukittuut. Namminersornerup ineriartortinneqarnissaani kommunit sulissuteqarfissaat angeqisoq nukinnillu tamanik pisariaqartitsisussaq tassaniippoq. Aasiit Kaassassummik oqaluttuaq eqqaavara - oqaluttuaq taanna sorpassuarnut atorsinnaagami ilinniutissartaqarlunilu ajunngitsunik ajortunillu. Taanna pinngussaminik ”alliseequtiminik” piiaanermigut piginnaanngorsarsimanera pissarsuanngorsimanera torraagalugu ilaannikkooriarlunga assersuutitut atortarpara. Ilumummi inuiattut ingerlanitsinni taamatuttaaq aaqqissuussinernik kigaalaqutaasunik piiaanitsigut nukivut pitsaanerusumik atorsinnaalertariaqarpavut namminersornermik peqqinnartumik angusaqarniarnitsinni. Kommuneqarfiit kattuffianni namminersorneq aqqutingalugu namminersulivinnissamut alloriaqqinnissatsinni perrassaaqataanitsinni iluarsisariallit makku saqqummiutilaassavakka: · Allaffissornermi aaqqissuussinerit oqimaatsut qerattartoorsimasullu aaqqissuussinernik nutaanik taarserneqarlik. · Allaffissornermi suleqatigiinnerulertoqarli ataqatigiissaarisoqarlunilu. · Namminersornerullutik Oqartussat kommunillu ataatsimoorussamik pilersaarusiorlik atortorisatigut periarfissat sulisullu pisinnaassusii atorluarneqarnerusinnaaqqullugit. · Inuussutissarsiornerup siuarsarnissaanut nukiit katersorneqarlik aaqqissuussinerillu kigaalaqutaasut piiarneqarlutik. · Inuussutissarsiornermut akisussaaneq nunap immikkoortuinut siammarneqarli utaqqisaqattaanneq qitiusumiillu oqartussanut utaqqiinnaqqajaaneq qaangerneqarniassammat. · Illoqarfiit, nunaqarfiit suliniutillu aningaasanik pilersitsiviusinnaasut nangartarnagit akuersorneqarlik nammaqatigiinnerup aqqani allanik ilorraap tungaanut kalitarinnissinnaaniassammata. Kommunit tungaanniit isumaqarpugut pingaartumik anguniakkat tamakku ulluni, qaammatini ukiunilu aggersuni nukinnik atuiffiusariaqartut - anguneqarunimmi namminersorsinnaanerulersitsisussaammata inuiattullu iliuuseqarsinnaanerulersitsillutik. Tamakkulu imminni anguniagaapput angisuut. Suleqatigiiffilli pilersinniarneqartoq KANUKOKA-p kommuneqarfiit kattuffiattut ilaasortaanissamik pilersaanngilaq. Kisiannili suliniutit suulluunniit inuiattut namminiileriartuinnarnissamut tunngavilersuisut kattuffiup peqataaffinginiarpai, tamatumalu peqatigisaanik suliat pisortatigoortumik ingerlanneqartut peqataaffiginiarlugit. Soorlu Aaqqissuussaanermik iluarsaaqqinnissamik suliniut kommunit aaqqissuussaanerannik pisortallu ingerlatseriaasiannik kalluaasussaq KANUKOKA-p nukissaminik atuiffigingaatsiarniarpaa - suliallu tamatuma inernera aamma Kalaallit Nunaata namminiileriartorneranut sunniuteqanngitsoortussaanngilaq. Pingaaruteqarluinnarpoq inuiattut namminiileriartornermi alloriarnerit avissaartuuffiunatik pisarnissaat - taamaattumillu ippinnarpoq partiit ilaannaasa ataatsimiinnermut matumunnga aggersarneqarsimanerat. Partiit suliniaqatigiiffiillu apeqqummi inuiaqatigiit iluunngarmik attorneqarfigisassaanni qajaqatigiittariaqaraluarput. Qularutiginngilarali maanna alloriarnissatut tullertut pisortatigoortumik siunniunneqartoq - namminersornissaq - nunatsinni kommuneqarfiit tapersersoraat, tulliullugulu ”Namminersulivinnissaq” tamannalu angussavarput inuiaat tamatta peqatigiinnitsigut.
Jens Lars Fleischer |
