|
Februarip 26-anni 27-annilu 2004 Sulisartut Højskolianni SIK-p aaqqissuussaanik Nunatta namminersulernissaa pilugu isumasioqatigiittoqarnerani peqataapput Siumut-mit, IA-mit, ”Nammineq”-mit, KANUKOKA-mit, Sulisartut Højskoliannit, SIK-mit folketingimullu ilaasortat Nunatsinneersut aappaa. Ataatsimiinnermi peqataasut isumaqatigiipput suleqatigiiffimmik Nunatta namminersulivinnissaanik suliniuteqarfiusussamik kattuffiit, suliniaqatigiiffiit partiillu isumasioqatigiinnermi peqataatitaqartut peqataaffigisaannik pilersitsinissaq siunniunneqassasoq. Isumasioqatigiinnermi peqataasut tunulequttaminnik isumasiueqqereerpata – peqataanissamullu piginnaatitsissummik pissarsissappata - suliniaqatigiiffimmik pilersitsinissaq piviusunngortinniarneqarpoq maajip qiteqqunnerani ukiormanna SIK-p sinniisoqarfiata Qaqortumi ataatsimiinnissaanut atasumik. Peqataasut isumaqatigiipput namminersornermik maanna pilersitsiniarneq, namminersorneq pillugu naalakkersuisoqarfimmit siulersorneqartoq, aqqutaassasoq Nunatta namminersulivinnissaanut. Suliat taakku imminut uiuleriittumik anguniarneqarnissaat isumasioqatigiit inassutigaat. Nunatta namminersortup soorunami namminerisaminik tunngaviusumik inatsiseqalernissaanut piareersarnermi Ilisimatusarfik suleqatiserineqassaaq, aammalu allaffissornikkut aqutseriaatsimik Nunatsinnut inuinullu naleqquttumik siunnersuusiornissami Ilisimatusarfik suleqatiserineqassallunissaaq. Aningaasat ingerlaartarnerannik misissueqqissaarnissap namminersulernissatsinnut pingaaruteqarluinnarnera nassuerutigalugu suleqatigiiffittaassamit Folketingimi Atlantikup Avannaamiut Suleqatigiiffiat suleqatiserineqassasoq isumaqatigiissutigineqarportaaq. Tassunga atatillugu misissorumaneqarpoq Nunatta nammineq pigisaminik aningaaseriveqalernissaanut sillimmasiisarnikkullu ingerlatsiveqalernissaanut periarfissat. Nunatsinnut misigissuseqarneq kalaallisullu anersaarput atorlugit siulersuineq namminersulernissatsinnut piareersaatit pingaarnerit ilagimmassuk isumasioqatigiit pingaartilluinnarlugu naalakkersuisutsinnut erseqqissarumavaat maannamiit suliffeqarfiit inuiaqatigiit pigisaasa siulersuisuini qullersaqarfiinilu kalaallinik tamatigut inuttaliisarnissaq saneqqunneqarsinnaajunnaartoq. Oqaatsivut, eqqarsartaaserput inuiattullu anersaarput atorlugit suliffeqarfiutivut siulersulinngikkutsigit taamaaliorneq namminersulivinnissatsinnut kinguarsaataassaaq. Isumasioqatigiittaaq Inatsisartunut naalakkersuisunullu inassutigaat suliffeqarfinnik inuiaqatigiit kalaallit pigisaannik namminersortunngorsaaneq tunuarsimaarfigineqarallassasoq, kalaallit inuiaat piginnittuunerat aqqutigalugu suliffeqarfinnut pingaaruteqarluinnartutut oqartussaanitta nungukkiartortitaannginnissaa qulakkeerumallugu. Namminersortunik suleqatissarsiorneq ajunngilaq iluaqutaasinnaallunilu. Kisianni inuiaat suliffeqarfiutiminnut oqartussaaffeqarnerat qatangiinnartinneqassanngippat inuiaqatigiit piginneqataanerat piginneqataassutinit amerlanerussuteqarfiujuartussanngorlugu aaqqissuussisoqartariaqarpoq. Ukioq 2012 Nunatta Namminersortup pilersinneqarnissaa siunertaralugu sulineq ingerlanneqassasoq isumasioqatigiit isumaqatigiissutigaat. Maajip qeqqani ukiormanna namminersulivinnissamik suliniuteqartussamik suleqatigiiffimmik nutaamik pilersitsinissaq siunertaralugu Qaqortumi ataatsimeeqqinnissami Siumup naalakkersuisullu siulittaasuat Hans Enoksen kiisalu Inuit Ataqatigiit siulittaasuat, aningaasaqarnermut naalakkersuisoq Josef Motzfeldt aggersarneqassapput, soorluttaaq KNAPK-p siulittaasua Leif Fontain aggersarneqassasortaaq. Kattuffiit, partiit, suliniaqatigiiffiillu isumasioqatigiinnermi peqataasut saniatigut isumaqatigiissutigineqarportaaq namminersulivinnissap piareersarnerani kattuffiit peqatigiiffiillu siunertamut isumaqataasut allat sapinngisamik amerlasuut peqatiserineqassasut. Meeqqanut inuusuttunullu suliniaqatigiiffik Sorlak, Inuit Issittormiut Kattuffiat ICC, ilinniagaqartut kattuffii KIK aamma DKIK, Utoqqaat Kattuffiat, , Savaatillit Peqatigiit Suleqatigiissut, Nunaqarfinni Aqutsisut peqatigiiffiat KANUNUPE, Kalaallit Suliffiutillit Peqatigiiffiat, Arnat Peqatigiit, Atuakkiortut Peqatigiit, Atorfillit Kattuffiat – allallu Nunatta namminersulernissaanik piareersaaqataarusuttut suliniaqatigiiffimmik pilersitsinissami peqatiserineqassaspput. Aammattaaq partiit allat Nunatta namminersulernissaanut suleqataarusuttut aggersarneqarnissaat siunnerfigineqarpoq. Suliniaqatigiiffik qanoq taaguuteqassanersoq maajimi pilersitsiviusumik ataatsimiinnermi aalajangiiffigineqassaaq. Isumasioqatigiinnermik aaqqissuisut peqataasullu sinnerlugit Jess G. Berthelsen Makku aamma peqataapput: Kalistat Lund (Siumut), Markus E. Olsen (Siumut), Aqqalukasik Kanuthsen (IA), Jens Lars Fleischer (KANUKOKA), Vittus Jerimiassen (Nammineq), Hendrik Nielsen (SIK),Lars-Emil Johansn (MF), Beathe Hendriksen (SIK), Pauline Jørgensen (SIK), Paulus Broberg (SIK), Jonas Fleischer (SIK), Ujoorsi Therkildsen (SIK), Annassi Karolussen (SIK) Johanne Banke Thorup (SIK), Anton Larsen /SIK), Rosa Marie Høyer (SIK) kiisalu Kaj Lyberth (Sulisartut Højskoliat) |
