|
21. januaari 2004
Kommuninut tamanut: Namminersulernissaq pillugu kommunit peqatigalugit innuttaasunik oqallissaarinissaq Namminersulernissaq pillugu innuttaasunik oqallitsitsisoqartarniarpoq ukioq manna ukiunilu tulliuttuni marlussunni, taamalu namminersorneq pillugu allattoqarfimmiit siusinnerusukkulli ilisimatinneqartarpugut oqallitsitsinerit paasissutissanillu siaruarterinerit kommunit suleqatigilluarlugit pisarnissaat pingaartinneqartorujussuusoq. Tassami namminersulernissamik isuma innuttaasut akornanni aatsaat iluamik sorlanissinnaavoq nunap immikkoortuini ataasiakkaani innuttaasut misigisimappata oqallinnermik aqutseqataallutik tassungalu akisussaaqataallutik. Kommuneqarfiit kattuffianni siulittaasutut matumuuna kommunit inussiarnersumik kaammattorumavakka suleqatiginnikkusunneq tamanna ilassilluaqqullugu. Paasitinneqarpugut illoqarfinni assigiinngitsuni oqallitsitsinissat siulliit 2004-mi januaarip naalerneraniit juuni ilanngullugu pilersaarutigineqartut, tamakkulu ingerlanniarneqartut Namminersorneq pillugu Pisortaqarfimmi atorfillit kommunini pineqartuni attuumassuteqartunik suleqateqarnerisigut. Ualikkut ilinniartunik katersortitsisarnissat unnukkullu ilaatigut partiit immikkoortortaqarfiisa akuuffigisaannik tamanut ammasumik oqallitsitsisarnissat pilersaarutaapput. Namminersulernissamik eqqarsaat anguniagarlu inatsisartutigoortumik naalakkersuinermut taamaallaat attuumassuteqanngilaq, minnerunngitsumittaarli najukkani naalakkersuinermut attuumassuteqarpoq, tassa tunngaviusutigut inuit ulluinnarni atugarisaannut ileqquinullu tunngassuteqarami. Taamaattumik nuannissaqaaq oqarsinnaassagutta apeqqummi pingaaruteqartumi tassani kommunit tungaanniit sapinngisannguatsinnik iliuuseqarsimalluta innuttaasut tunngavilersueqataatikkumallugit isummertikkumallugillu.
Inussiarnersumik
Jens Lars Fleischer KANUKOKA-mi siulittaasoq Allakkap kopiia uunga: Namminersornermut naalakkersuisoq Jørgen Wæver Johansen |
