|
KANUKOKA-p siulittaasuata Jens Lars Fleischerip oqalugiaataa nunaqarfiit pillugit ataatsimeersuarnermi ulluni marsip 22-ianiit 26-ianut 2004.
Nunaqarfinni aqutsisut akisussaaffii – ullumi siunissamilu
Siullermik oqaatigissavara nuannaarutigigakku maani nunaqarfiit pillugit ataatsimeersuarnermi Kattuffimmiit peqataasinnaagama. Neriuppunga peqataasorpassuugatta ataatsimut nukiit atorlugit ataatsimeersuarnerup qulequtarisaa ”Nunaqarfiit namminneq ingerlatsisut” anguniarnissaanut pitsaasunik anguneqarsinnaasunillu immersorneqarsinnaajumaartoq pissutsit piviusut ullumikkut atuuttut aallaavigalugit. Naluneqanngitsutut nunaqarfinni aqutsisut piginnaatitaanerat akisussaassutsimillu annerusumik tigusisinnaanerat Inatsisartut inatsisaat nr. 20, 3. novembari 1994-imeersoq tunngavigalugu kommunalbestyrelsinit periarfissinneqarsinnaanerat aqqutissiuunneqarsimavoq. Tamannalu periarfissaq atorlugu kommunini amerlasuuni ukiuni makkunani nunaqarfinni aqutsisut akisussaaffinnik aningaasatigullu kommunalbestyrelsit nunaqarfinnut immikkoortitaat atorlugit ingerlatsisoqartartoq nalunngilarput. Inatsisitigut tunngaviliinerup siunertaraa inuk qitiutillugu suliniuteqarsinnaaneq aammalu nunaqarfinni pissutsit atuuttut tunngavigalugit ingerlatsinissamik aqutsinissamillu periarfissiineruvoq. Ullumikkulli pissutsit piviusut qiviaraanni qulaani taaneqartutut periarfissat kommunini tamani atuutinngitsut nalunngilarput. Ukiut qulillit inatsisip periarfissiinerata kingorna ingerlareersimaleraluartut suli nunaqarfippassuaqarpoq nunaqarfinni aqutsisut akisussaaffimmik annertunerusunik tigusaqarsimanngitsunik. Tamannalu sunik tunngaveqarpa? Tamanna ilaatigut pissuteqarsinnaavoq kommunit annerusumik minnerusumilluunniit inatsisip tungaviliussaasa naammassineqarnissaanut soqutiginninnerat peqataarusussuseqarnerallu. Ilaatigummi oqaatigineqartarpoq nunaqarfinni aqutsisut annertunerusumik oqartussaallutik pisinnaatitaaffeqalernissaannut kommunini arlalinni nangaanartoqartinneqartartoq pissutaatinneqarluni nunaqarfinni aqutsisut allaffimmiuisalu pisariaqartutigut ilisimasaasa killeqarnerat / ilinniagaqannginnerat sulianik ingerlatsinissamut. Aammali kommunit ilaat taamatut nunaqarfinni aqutsisunut akisussaaffimmik tunniussiniarnerminni annikippallaamik piareersartarsimaneq ajutoorutigisarsimagaat paasinarpoq, tamannalu uggornartutut taasariaqarpoq. Kattuffimmiilli aamma akerlianik maluginiarsimavarput kommunit arlaqartut nunaqarfinnut pisinnaatitaaffinnik tunniussisimasut, tassa nunaqarfinni aqutsisut annertunerusumik oqartussaallutik pisinnaatitaaffilersorneqarnerisigut aamma aningaasaqarnermut tunngassuteqartuni. Taamatullu ingerlatsinerminni ajunngitsumik misilittagaqarlutik. Pissutsit qulaani taasakka tunngavigalugit takorloorpara siunissami IT-teknologii atorlugu nunaqarfinni ineriartortitsineq siuarsaanissarlu ullutsinni avaqqunneqarsinnaajunnaartoq. Nalunngilarpummi qarasaasiatigut attaveqaatitigullu atortorissaarutit ullumikkut sukkasuumik ilaatigulluunniit malinnaaffigiuminnaatsumik ineriartorfiusut. Atortorissaarutit taasakka atorlugit isumaqarpunga nunaqarfinni innuttaasunik sullissinerup pitsaanerusumik ingerlanneqarsinnaanera upperilluinnarpara. Takorloorpara nunaqarfimmiut ataatsimoorussamik IT-teknologii attaveqarniarnermilu aqqutit allat atorlugit sullinneqarnerata siuarsarneqarsinnaanera, taamaasilluni nunaqarfinni innuttaasunik sullissinerup pitsanngorsarneqarsinnaanera anguniarneqassammat naak ingerlatsinermut aningaasaliissutaasartut qaffatsinngikkaluarlugit. Nunaqarfinni allaffeqarfiit pisortanit ingerlanneqartut aammalu pisortat suliffeqarfiutaasa allaffii qangali eqqartorneqartarpoq ataatsimoortumik ingerlanneqarsinnaaneri. Ullumikkut taamatut ingerlatsinissamut isumaqarpunga piffissanngortoq tassanimi innuttaasut sullinneqarneri eqaannerusumik pisariunnginnerusumillu ingerlanneqarsinnaanerat takorloorakku. Suliffeqarfiit ataatsimut illutaqalerpata taava innuttaasut ornissinnaasaat pisariinnerusumillu sullinneqarsinnaalersinnaanerat takorloorsinnaavara. Tassanimi ataatsimut illumi assersuutigalugu issinnaapput kommunip allaffia, allakkerivik aningaaserivittut sullissisinnaasoq allallu pisortat sulliviisa immikkoortortaqarfii. Innuttaasut tassuunatigut ataqatigiissaakkamik sullinneqarnerat anguneqarsinnaavoq, aammali allaffeqarfiit illoqatigiinnermikkut sulisut imminnut ikioqatigiissinnaanerat aammalu atortorissaarutitigut peqatigiinnermikkut pitsaanerusumik akikinnerusumilluunniit ingerlatsisinnaanerat takorloorneqarsinnaammat. Qulaani taaneqartut saniatigut takorloorneqarsinnaavoq anguniarneqarlunilu nunaqarfinni sullissisut ataatsimut illumik sulliveqartut illoqarfiit arlaanni ataatsimoorussamik ataqatigiissaarisussanik aammalu taamatut ingerlatsinerini ikiortissaminnik toqqammavissaminnik siunnersorteqarfimmillu pilersitsisoqarsinnaasoq. Tassani toqqammavigaara maannakkutut kommunini immikkoorlutik sullinneqarnerat qimallugu allaasumilli nukinnik, aningaasanik atuineq allatut aaqqissuussisoqarsinnaanera upperigakku – qulaani taagukkakka tunngavigalugit. Nalunngilarput ukiuni makkunani nunatta aningaasaqarniarnera ataatsimut isigalugu ilungersornarsiartortoq. Inuiaqatigiinnut aningaasaliissutaasartut Namminersornerullutik Oqartussaniit kommuniniillu killeqarmata atorluaanerunissarlu tunaartariartorneqarmat taava aqqutissat toqqamavissallu allat atorlugit ingerlasariaqalernerput ersarissiartortoq malunnarpoq. Ukiut teknikkikkut siuariartorfioqisut atorpavut atortorissaarutillu allanngoriartorneri aammalu inuiattut ilinniartitaanikkut qaffakkiartornerput ilutigalugu ukiuni aggersuni nutarterinissaq pisariaqarluinnartoq nalunngilarput, isumaqarpungami taamaaliunnginnissamut akissaqanngitsugut. Innuttaasunut tamanut pisariillisaaneq sullissinerullu ullumikkornit pitsaanerusoq akikinnerusorluunniit ukiuni aggersuni angusinnaagutsigu taava isumaqarpunga nukiit aningaasallu inuutissarsiornermut aningaasarsiorfissanillu nutaanik pilersitsiniarnermut atorneqarsinnaanissaat aqqutissiuunneqassagaluartoq. Taamatut ataatsimeersuartunut neriullunga eqqarsaatissiillunga tamassi qulequtaq pillugu suliniutissatut anguniagassatullu isumassarsiornissinni sullilluarnissassinnik kissaappassi.
Jens Lars Fleischer
siulittaasoq |
