Kommuninut ataatsimoortumik tapiissutit 2006-imi 775,4 mio. kr.-iussapput, taakkunannga 12 mio. kr.-it akinik akissarsianillu iluarsiinerullutik.
Inatsisartut ilinniartitaanermut suliniuteqarnerunissamut tapertatut 2005-imut Aningaasanut Inatsimmi 2006-imi 25 mio. kr.-it missaannik ataatsimoortumik tapiissutini sipaaruteqarnissamik missingersuuteqarput 2008-mit 75 mio. kr.-it sinnerlugit amerlisussanik. Ilinniartitaanermut piginnaasaqarnerulersitsiniarnermullu aningaasalersuiniarluni allatut tulleriiaarisoqarnissaata kommuninut Namminersornerullutik Oqartussanullu ataatsimoorluni suliassaanera illuatungeriit isumaqatigiissutigaat.
Kommunit aningaasaqarnerat eqqarsaatigalugu kommunit ilinniartitaanermut suliniuteqarnermut tapersiinissaata ukiup affaanik kinguartinneqarnissaa illuatungeriit isumaqatigiissutigaat, taamaalilluni ataatsimoortumik tapiissutit 2006-imi 13 mio. kr.-inik, 2007-imi 39 mio. kr.-inik, 2008-mi 65 mio- kr.-inik 2009-miillu 78 mio. kr.-inik ikilisinneqarnissaat illuatungeriit isumaqatigiissutigaat.
Akileraartarnermut akitsuutinullu tunngasut allatut aaqqissuunneqarnissaat ataatsimoortinneqarnissaallu Inatsisartut aalajangiuppaat. Suliassat akileraartarnermut akitsuutinullu tunngasut 1. januar 2007-imi taamaasilluni ataatsimoortinneqarsinnaanissaat illuatungeriit naatsorsuutigaat. Aammattaaq allaffissornermi ukiumut 5,5 mio. kr.-it missaasa sipaarneqarsinnaanissaat 10 mio. kr.-illu missaannik iluanaaruteqarnerusinnaanissaq illuatungeriit naatsorsuutigaat.
Tamatuma saniatigut siusinaartumik soraarnerussutisianut, ineqarnermut tapiissutinut kiisalu meeqqanut inuusuttuaqqanullu tunngasunut ataatsimoortumik tapiissutit iluarsineqarnissaat illuatungeriit isumaqatigiissutigaat. Tamatuma saniatigut isumaqatigiissut naapertorlugu Namminersornerullutik Oqartussat sillimmasiinernut, qarasaasiaqarnikkut kommunit atuarfianni atorneqartumut ATTAT-mmut 2006-imilu assigiimmik akeqartitsinerup sunniutaanut taarsiissutitut aningaasartuuteqarnerussutaannut aningaasaliissapput.
Kiisalu eqqakkat kuuffisa pingaarnerit iluarsaanneqarnissaannut 2005-imit 2009-mut ataatsimoortumik tapiissutit ukiumut 17 mio. kr.-inik agguarneqarnissaat illuatungeriit aalajangersarpaat. Naalakkersuisullu kommuninut oqaatigaat Inatsisartut sanaartorfissagissaanermut atatillugu innaallagissamut imermullu atortunut Nukissiorfinnut 2006-imiit aningaasaliisarnissaat sulissutiginiaritsik.
Isumaqatigiissut atsiugaq www.kanukoka.gl aamma www.nanoq.gl -imi
atuarneqarsinnaavoq.
|
_______________________ |
___________________________ |
|
Josef Motzfeldt Aningaasanut Naalakkersuisoq |
Jens Lars Fleischer KANUKOKA-mut siulittaasoq |
Paasissutissat sukumiinerusut pillugit Aningaasaqarnermut Pisortaq Peter Beck telefon 34 52 01-imut imaluunniit direktør Martha Labansen telefon 32 21 00-imut attavigineqarsinnaapput.
