|
Saaffiginnissummi pineqarpoq "aalisartut, piniartut ilaqutaasalu ajornartorsiornerat". Tamatumanilu tunngaviuvoq aalisartup nuliata Uummannarmiup Margrethe Nielsenip KANUKOKA-mut allagaa tamanut ammasoq, tassani allassimalluni ukioq manna silap unerisimannginnerujussuani "meerartannguavut kaatsinneqarsinnaanngitsut". Tamatuma kingunerisaanik Jens Lars Fleischer kommuninut tamanut allagaqarpoq. KANUKOKA-p siulittaasuata kommunit aperai aalisartut meeraasa kaannerannik ajornartorsiut ilisimaneqarnersoq. Kommuninullu eqqaasitsissutigaa pisortanit ikiorsiisarneq pillugu inatsisartut peqqussutaata aamma ilaqutariinnut aalisarnermik piniarnermillu inuussutissarsiuteqartunut ajornartoortunut atuunnera. Leif Fontainep Jens Lars Fleischerillu ataatsimoorlutik allakkaminni eqqaavaat KNAPK 2003-mi naalakkersuisunut saaffiginnissimasoq isorliunerusuni piniartut aalisartullu inuuniarnermikkut silamik pissuteqartumik ajornartooqqasut tapiiffigeqqugaluarlugit. Taamani naalakkersuisut innersuussutigisimavaat piniartut inuuniarnikkut atugarisaannik misissuisoqarnera siunissami piniartutut inuussutissarsiuteqarnerup qanoq aaqqiivigineqarnissaanik ersarinnerulersitsisussamik. Fontaine Fleischerilu Margrethe Nielsenip aalisartunut ajornartooqqasunut nuna tamakkerlugu katersuiniussinissamik kajumissaarutaanut tunngaviusutigut tapersersuipput, inuuniarnikkullu atugarisanik misissuinerup naammassineqarnissaa ujartorpaat. |
