|
Maanna ukiumut 2005-imut isereernitsinni eqqarsaatigeqqajaanarpoq Asiap kangiani kujataani pinngortitami ajunaarnersuakkut eqqugaasut ulluni aggersuni qanoq atsigisunik anigorniagassaqassasut, misigissutsikkut inooqatigiinnikkullu. Annilaarneq eqqugaasunullu misiginneqataaneq aammattaaq nunatsinni angerlarsimaffippassuarnut anngussimasoq nalunngilara, misiginneqataanerlu tamanna kusanartuuvoq pissusissamisoorlunilu - nunarsuarmioqataagattami. Inuuneq ingerlaqqittariaqarmat inuiaqatigiit assigiinngitsut eqqugaasut aserukkanik nappaaqqinniarlutik inunnillu annaasaqartunik ikiuiniarlutik suliassarilikkaminni angeqisumi iluatsilluarnissaannik kissaattariaqarpavut sapinngisatsinnillu tapersersorlugit. Taamaattumik maani uaguttaaq pisussat nalugaluarlugilluunniit sillimajuarnissarput pingaartittariaqarparput. Maannamut ilisimaarereerparput pinngortitap nukissui qanoq peqqarniissinnaatigisut. Taamaattumik avaqqukkuminaappoq uaguttaaq sillimaniarnikkut inissisimanitta ingerlaavartumik nalilersortuarnissaa. Ilaqutariit nukittorsarneqarlit Kalaallit Nunaanni ilaqutariit nukittorsartariaqarput. Tamanna isumaginninnermi politikkimi eqqarsariartaatsimilu pingaarnerpaatittariaqarpoq. Soorlu kommunini isumaginninnermi pisortat novembarimi isumasioqatigiinneranni oqaaseqarninni erseqqissariga, meeqqat inuusuttullu ajunngitsumik isumagineqarnissaannut - sumiginnarneqannginnissaannut - akisussaaffik siulleq angajoqqaaniippoq, soorunami. Akisussaaffilli taanna iluamik ingerlanneqanngippat inuiaqatigiit isumaginninnikkut aaqqissuussineri isumannaatsumik sassarsinnaasariaqarput, ajornerusunillu pisoqarnissaralua pinngitsoortillugu. Tamatumalu peqatigisaanik angajoqqaat sumiginnaasut inuiaqatigiinnit tapersersorneqartariaqarput nukittorsarlugit, taamalu akisussaaffimminnik naammassinnissinnaalersillugit. Taamaattumik-una aamma anguniartariaqartoq nukiit aningaasallu inuiaqatigiit isumaginninnermut atortagaasa pitsaanerusumik, eqaannerusumik angusaqarluarnarnerusumillu atorneqarsinnaanissaat. Ukiullu nikinneranni kommunit kajumissaarusuppakka meeqqanut inuusuttuaqqanullu qanoq politikkeqarnissaq nalilersortuaqqullugu aammalu ilaqutariit nukittorsarneqarnissaat meeqqanik inuusuttuaqqanillu isumaginninnermi aallaavigeqqullugu. Pisortat ingerlatsiviisa aaqqissuussaanerannik iluarsaaqqinnissaq Aaqqissuussaanermut Isumalioqatigiissitat suliartik ukioq manna naammassisussaavaat, saqqummiussassaallu kommunit tungaannit eqqumaffigilluassavavut nalilersueqataaffigalugillu. Isumalioqatigiissitanut suliassiissutaavoq pisortat - tassa Namminersornerullutik Oqartussat kommunillu - ingerlatsiviisa aaqqissuussaanerat ataatsimut isigalugu aaqqiissutissanik siunnersuusiussasut. Tupinnanngilarlu isumalioqatigiissitat kaammattuutigigallagaasa oqallisigineqarneranni ilaannikkut kommunit kattussuussinnissaata kattussuutinnginnissaataluunniit sammineqarnerulertarnera. Kisianni kommuneqarfiit kattuffianni siulittaasutut isumaqarpunga apeqqut tamanna immini pingaarnerunngitsoq, pingaarnerusorli tassaasoq pisortatigoortumik sullissinerit ullutsinnut naleqquttumik qanoq pitsanngorsarneqarsinnaanersut aammalu inuiaqatigiinni oqartussaaffiit kommuninut tunniussuunneqarnerat qanoq isumannaannerpaamik pisinnaanersoq. Qularutissaanngilaq Aaqqissuussaanermut Isumalioqatigiissitat maannamut kaammattuutigisaat piviusunngortinneqarpata inuiaqatigiinni naalakkersuinikkut allaffissornikkullu assiliaq sungiusimasatsinnit allaanerulluinnalersinnaasoq - tamatumanilu innuttaasunut ajunngitsussaq pingaarnerpaajuvoq. Akit assigiikkunnaarsitaanerat Januaarip aallaqqaataani innaallagissap erngullu akiinik aaqqissuussineq nutaaq atuutilerpoq - assigiimmik akeqartitsineq ukiorpassuarni atuussimasoq atorunnaarpoq. Tamanna ilaasa iluaraat, ilaasalu iluarinngilaat. Qanorluunniilli oqaatigigaluarutsigu tamanna inuiaqatigiinni pigisat qanoq agguataarneqarnerannut qanorlu atorneqarnerannut attuumassuteqarpoq. Maluginiarpara naalakkersuisut siulittaasuat ukiortaami oqaaseqarnermini oqartoq 'siunertaanngitsoq innuttaasut kommunillu atugaasa ajornerulernissaat, taamaattumillu ukiut tamaasa akinik allannguutinillu nalilersuisoqartassasoq'. Neriorsuut tamanna eqqaamassavarput. Kajumissaarutigiumavaralu akit sungiusimasatsitut assigiikkunnaarnerat ajornartorsiutaannartut tigussanngikkipput nakkaannarfiginagulu. Akinik assigiikkunnaarsitsinissaq pineqalermat uanga nammineq nangaanartoqartissimaqaara. Maannali aaqqiineq isigerusuppara unammilligassatut - inuiaqatigiinni pigisat aningaasallu siuarsaataanerusumik qanoq atorneqarsinnaanerannik qanorlu agguaanneqarluarnerusinnaanerannik ataavartumik naliliisarnissami sakkussatut. - - - Naggataatigut kommunini qinikkat sulisullu qutsavigingaarusuppakka ukiumi qaangiuttumi assigiinngitsutigut pisinnaasartillu naapertorlugu ilungersoqataasimanerannut. Nunaqqataasullu tamaasa ukiortaami ajunngitsunik tamanik kissaallugit pilluaqquakka. Upernaaru demokratiimi killiffiit sakkullu pingaaruteqartut ilaat, kommunalbestyrelsinut nunaqarfinnilu aqutsisunut qinersinissat, pisussaapput. Pisussat taakku qilanaarutiginiartigit innuttaasut oqartussaaqataaneranni pikialaarfittut unneqqarissumillu iliuuseqarfittut.
Inussiarnersumik |
