|
Nunatsinni silaannakkut imaatigullu angallannerup tapiissutinik ingerlatsiviusup allanngortinneqarnissaannik Naalakkersuisut siunniussaanni tusagassiuutitiguunerusoq malinnaaffigisanni ukioq kaajallallugu illoqarfiit akornanni illoqarfinniillu nunaqarfinnut angallannerit tamakkiinerusumik aaqqiiviginiarneqarnerat pissanganartuutippara. Pineqartuni tunngavilersuutit ilisarnarput. Ukiut arlaqalersut matuma siornatigut illoqarfiit tamangajammik timmisartunut suluusalinnut mittarfiliorfigineqarnissaat Inatsisartutigoortumik sulissutigineqalermat anguniakkanut oqaasertaliussat eqqaamasakka malillugit tassaapput ”Kalaallit Nunaata iluani kikkulluunniit akikinnerusumik aamma pilertornerusumik angalasinnaalernissaat anguneqassasoq”. Maannakkut tamanna nalilissagaanni oqartariaqarpoq ukiut qulit kingulliit ingerlaneranni angallanneq akikinnerulersimanngitsoq, mittarfiliortiternertigulli pilertornerusumik angalasoqartalersimasoq. Ilinniartitaanerit aningaasaliiffigineqarneruniassammata angallassinermut tapiissutit ikililerneqarniarnerat eqqarsaatigissagaanni soorluuna "akikinnerusumik” angalasinnaalernissap angunissaa suli qularnartoq. Tassami Namminersornerullutik Oqartussat internetikkut nittartagaanni nalunaarut "Angallanneq nutaamik aaqqissuunneqarpoq"- mik qulequtalik misissorlugu takuneqarsinnaavoq illoqarfinni amerlanerni (nunatta Kujataa Qeqqalu kisiisa pinnagu) "Namminersornerullutik Oqartussat qulimiguulinnut bilitsit akiinik 10 procentinik qaffaassasut, ukiuni kingullerni tallimani bilitsit akii iluarsiivigineqarsimanngimmata." – Oqaasertaq taanna eqqarsalertitsivoq, apererusulersitsillunilu, ukiuni tallimani kingullerni Namminersornerullutik Oqartussani taakkualu ingerlatsiviini naatsorsuutit Inatsisartunit akuerineqareersut bilitsit akiisa ukiuni kingullerni tallimani qaffassimannginnerata kingumoortumik atuisunut akilersinniarnissaat pissusissamisoornersoq. Angallannerup nutaamik aaqqissuunniarneqarnera nalilersussallugu soqutiginarpoq. Soorlu Uummannap eqqaani aasaanerani qaatsiartaammik ukiuuneranilu qulimiguulimmik angallassisoqalernissaa atuarlugu eqqarsariarnarpoq. Qaatsiartaammik ilaasunik nioqqutissanillu illoqarfiit nunaqarfiillu akornanni angallassineq nunatta qeqqani ukioq kaajallallugu ingerlakkaanni pitsaanerunnginnerluni? Nunattami qeqqa serminik iigartartoqannginnami sikuisannerulluni iluliaqarfiunnginneruvoq, Nuup kangerluata aniatitsilaartaranera eqqaassanngikkaani. Mittarfiit pioreersut matuneqassanngippata isumaqarluinnarpunga taakkua saniatigut illoqarfinnut mittarfeqanngitsunut silaannakkut angallanneq timmisartut suluusallit mikinerit atorlugit (mittarfiit naannerit ujaraaqqanik qallikkat atorlugit) kiisalu illoqarfinniit nunaqarfinnut timmisartut qulimiguullit atorlugit angallanneq eqaallisartariaqartoq. Tamanna anguneqarpat ukioq kaajallallugu angalasoqarsinnaalissaaq Kalaallit Nunaat tamakkerlugu. Ukiukkut sikusarnera, aasaanerani sikorsuaqartarnera allallu aporfigiunnaamillugit eqaannerusumik pilertornerusumillu angallattoqarsinnaalissagaluarpoq. Taamatulli isummissagaanni pingaartuuvoq qulakkiissallugu angalaneq tapiiffigineqanngikkaluartumik tamanut akikinnerulersinnaanersoq. Sullutami aamma allanik mittarfiliortitsissaagut tapiissutit qaavisigut tapiissuteqarfigisassanik innuttaasullu akileraarutaannut qaffassaataasussanik? Umiarsuartigut ilaasunik angallassineq inuppassuarnit ornigineqartarpoq akikinnerunera pinerullugu. Qularnanngilarmi umiarsuartigut angalaneq ornitanut qaninnerusunut angalaniartilluni imminut akilersinnaanerusoq, ungasinnerusunulli ullut marluk sinnerlugit ornittarialinnut angalanermi bilitsit akiisa qaavisigut umiarsuarmi nerisaqarnermut aamma akikitsuunngitsumut akissaajaatissaqarpoq. Sulinngiffeqarnerlu atorlugu umiarsuarmik illoqarfinnut allanukarneq piffissamik atuinarnerusaraluartoq aamma inoqateqarpugut sinerissatta alianaannersuanik alutorsarusuttunik. Aasakkut sulinngiffeqarnerup nalaani, ilinniagaqartut atuarunnaarneranni atualeqqinnerannilu taamatullu takornariaqarnerup nalaani umiarsuit ilaasunik angallassisut annertuumik atugaasarput, ilaasullu ikinnerpaaffigisarpaat ukiaq ukiorlu. Umiarsuit ingerlannerannut aningaasartuutit matussusernissaat eqqarsaatigigaanni eqqumiiginanngitsoortanngilaq ilaasut ikilineranni umiarsuarni marlunni inissat imaqanngitsorpassuusarnerat, isumaliornartarluni tapiissutinik miluffeqanngitsuugunik ukiuunerani nunani allani takornariaqarnermik kiffartuussiniarlutik suliassarsiortarsinnaagaluartut. Angallannerup nutaamik aaqqissuunneqarnissaa Inatsisartut oqallisigisussaammassuk isumaqarpunga aaqqissuussinermi ikaarsaariaqarfeqartumik iliuuseqartoqartariaqartoq. Atuisunummi taama annertutigisumik aammalu kikkut tamat aningaasatigut ingerlatsinerannut sunniuttussamik allannguisoqassatillugu ikaarsaariarfiusumik aaqqissuussinissaq isumatusaarnerussaaq. Ilanngulluguttaaq namminersorlutik suliffiutillit ilaasunik usinillu angallassisinnaanerisa periarfissinneqarnissaat nalilersoqqunaqaaq. Nutaamik aaqqissuussiniarnerit kommuninut ataasiakkaanut nunaqarfinnullu sunniutissaat sukumiinerusumik erseqqissarlugit saqqummiunneqarnissaat Naalakkersuisunut minnerpaamik piumasarisariaqartut isumaqarpunga. Apererusunnarpormi: Taama tassanngaannartigisumik Naalakkersuisut angallannermik allannguiniarnerat atuisunut/kiffartuutanut sutigut pitsanngoriaateqartitsiniarpa? Paarlattuanillu pitsaanngequtissat suuppat, taakkualu qanoq iluarsineqarniarpat?
Inussiarnersumik |
