|
KANUKOKA nunatsinni kommunaldirektørit aningaasaqarnermullu pisortat tamaasa saaffiginerullugit ulluni tallimani Kangerlussuarmi isumasioqatigiissitsivoq. Isumasioqatigiinneq tamakkerlugu sammineqarput kommunit kattussuunnissaat aamma suliassanik Namminersornerullutik Oqartussaniit kommuninut nussuinissaq – tamakkulu assigiinngitsorpassuarnit isigalugit sammineqarput. Taama isumasioqatigiissitsineq aaqqissuussaanerup allanngortinnissaata qanoq pisariutigissangatinneqarnera pillugu paasisaqarfiulluarmat amerlanernit iluarisimaarneqarpoq. Isumasioqatigiinneq Danmarkimi Kommunit Kattuffiata siunnersuisoqarfianit (KLK) aallarnerneqarpoq, taassuma aaqqissuussinikkut annertuunik allanngortitsiniartarnerup, soorlu assersuutigalugu kommunit kattussuunnissaata, qanoq passunneqarnissaa ulluni marlunni ilinniartitsissutigimmagu. KLK’p tamanna assut misilittaqarfigilersimavaa, tassa Danmarkimi kommunit kattussortussat ilarpassuinut siunnersuisuussarsimagami. Aaqqissuussaanermik Isumalioqatigiissitat isumasioqatigiinnermi ulloq ataaseq naallugu peqataapput, tamatumani pingaartumik sumiiffinni ataasiakkaani inuit oqartussaaqataanerannut tunngatillugit ajornartorsiutit kommunini ulluinnarni ingerlatsisuusut tungaannut misiligarneqarlutik. Tamakku saniatigut kommunit killeqarfii, suliassanik Namminersornerullutik Oqartussaniit nussuinissaq siunissamilu akileraartitsinerup ingerlanneqarnissaa pillugit Aaqqissuussaanermut Isumalioqatigiissitat oqalliseqatigineqarnissaannut aamma periarfissaqarsimavoq. Isumasioqatigiinnerup sinnerani ukkanneqartut tassaapput kommunini aqutseriaatsit nutaat, tamatumani soorlu akissarsiat katillutik amerlassusiinik aqutsineq, anguniakkat sinaakkusiussanillu aqutsineq, pisortaqatigiit qanoq katitigaanissaat aamma atsiorlugu isumaqatigiissusianik aqutsineq saqqummiussorneqarlutik oqalliserineqarlutillu. Aamma kommunerujussuanngortussatut siunnersuutigineqartuni aningaasanut tunngasutigut naatsorsukkat, soorlu akiitsunut, akileraarutit procentiinut nalimmassaatitullu aaqqissuussanut tungasut assigiinngitsut kommuninut saqqummiussorneqarput. Isumasioqatigiinnermi peqataasut 41-upput, taakku ilaat 29-t kommunini allaffissornikkut pisortatut inissisimasut. KANUKOKA aatsaat pernarluni kommunaldirektørit aningaasaqarnermullu pisortat ataatsimoortillugit isumasioqatigiissitsivoq. Peqataasut akerliusoqaratik isumaqatigiissutigaat aamma siunissami ukiumoortumik isumasioqatigiittarnissat ataatsimoorunneqartarnissaat kissaatiginartoq.
Inussiarnersumik |
