Kommunit qulit 2004-mi katillutik akkulumatorinik batteriinilli avatangiisinut navianartunik 113 tonsinik atoqqitassanngorlugit nassiussuisimapput. 22 tonsingajaat Atlantikukkoortaatinut mittarfinnit, Nukissiorfinnit Tele-millu toqqaannartumik nassiussaapput – katillugit Kalaallit Nunaannit 135 tonsingajaat.
"Kisitsisut uagutsinnut takutippaat kommunit maannakkut ajunngivissumik ileqquliussimagaat batteriit immikkoortui avatangiisinut navianartut katersortarlugit, nalunaarutigisarlugit, minnerunngitsumillu atoqqitassanngorlugit nassiuttarlugit", KANUKOKA’p pisortaa Martha Labansen oqarpoq. "Taama ineriartorneq nuannersuuvoq, neriuppugullu tamanna eqqakkat avatangiisinut navianartut immikkoortuinik suli amerlanerusunik katersuilluta ukiuni aggersuni malitseqartikkumaaripput."
Mokana 2003-mi 175 tonsinik Kalaallit Nunaanniit tigusaqarpoq. Sanilliullugu taaneqarsinnaavoq Mokana ukiuni 1998 – 2002-mi akkumulatorinik katillugit 182 tonsit missaannik tigusaqarsimammat.
2003-mi kommunit ilarpassuisa paasisitsiniaanerup "Batteriit tunniutikkit" aallartinneqarta kingorna eqqakkat immikkoortiternissaannut periarfissaq atortalersimannguatsiarpaat pingaartumillu akkumulatorit aqerlortallit Mokana-mut nassiuttarlugit.
"Ukioq manna tamakku ikinnerumaarnissaat ilimagereersimavarput, tassami malunnarmat kommunit ilarpassui eqqakkat uninngatiinnakkat piiarnissaannut periarfissaq siorna atorluarsimagaat. Taamaattorli paasinarsivoq batteriit akkumulattorillu avatangiisinut navianartut 30 tonsiinnarnik annikinnerusut nassiussorsimagivut. Tamanna nalerorlugu kommunit marluk nalunaarsimapput batteriit akkumulatorillu katersamik nassiunnissaannut aningaasat pissutigalugit ukiup naatsorsuiffiup nutaap aallartinnissaanut utaqqigallarniarlutik," Martha Labansen nangilluni oqarpoq. "Apeqqut tamanna misissuataartariaqassavarput, ilaatigut ataatsimoortumik tapiissutissat isumaqatigiinniutigineqarnerinut atasumik. Eqqakkanik passussinerup avatangiisinik mianerinninnerulersillugu allanngortiternerani aningaasartuutit inuiaqatigiit ataatsimoorlutik akiligassarisariaqarpaat."
2004-mi batteriit pillugit nalunaarut - Kisitsit maani pinerqarsinnaapput
Kommunit qanoq iliorlutik eqqakkat passuttarneraat aamma eqqaanaveersaartitsineq pillugit http://www.kanukoka.gl/3337 -mi atuagassaqarpoq.
Inussiarnersumik inuulluaqqusillunga
Martha Labansen
Pisortaq
