|
Ukioq 2005 tamatsinnut assigiingitsorpassuarnik nalaataqarfiullunilu suliaqarfiusoq qaangiutilerpoq. Ukiup ulluisa taamaalineranni juullisioreersimalersarpugut. Juullip oqariartuutaata naneruutitut aamma ukiup taarnera qaangiutsilersarpaa, qaamanerlu uteraangat inuunerput qaamanerulerlunilu oqinnerulersuttut ittarpoq. Ukiumi qaangiutilersumi suliat ingerlasut nutaami nanginneqartussaapput, pitsaanerusunillu angusaqarnissaq siunertaralugu tamatta ukioq nutaaq tikilluaqqullugu suliffigisussaavarput. Tassami aamma ukioq 2006 kommunit siunissaat eqqarsaatigalugu immikkut pingaaruteqartumik oqalliffiullunilu naleqqersuiffiusussatut taasariaqarpoq, tassa pisortat ingerlatsiviisa kommunillu aaqqissuussaanerannik iluarsaaqqinnissaq ukiumi tassani naalakkersuinikkut isummerfigineqartussaammat. Naalakkersuisut siulittaasuata suliami tamatumani kommunini oqartussat ingerlaqatigilluinnarlugit suleriaaseqartoqarnissaanik oqaaseqarsimanera silatusaarneruvoq. Tamannalu naapertorlugu naatsorsuutigilluinnarparput Aaqqissuussaanermut Isumalioqatigiissitat isumaliutissiissutaat borgmesterit kommunaldirektørillu marsimi 2006-imi naapeqatigiinnissaminni oqallisigereerpassuk aatsaat Inatsisartut naalakkersuisullu isummerniarumaartut. Tamatumanimi pineqartut tassaapput ulluinnarni inuunermut attuumassuteqarluinnartut: Innuttaasut kiffartuunneqarnerat oqartussaaqataanerallu. Taamaattumik isumatusaarnissaq aammalu innuttaasut taakkualu najukkaminni naalakkersuinikkut sinniisaat peqatigalugit tunngavilersuinissaq pisariaqarluinnassapput. Nunatsinni pisortat suliassaqarfiinik aaqqissuusseqqinniarnerup pissanganartup tamatuma saniatigut immikkut taarusuppakka inuussutissarsiornikkut ilinniartitaanikkullu siuarsaanissamik suliniutit inuiaqatigiit aaqqissuussaaneranni maanna atorfissaqartinneqartorujussuusut. Tamatumani eqqarsaatigaara inuussutissarsiutinik siuarsaanermi aaqqissuussineq nutaaq, nunap immikkoortuini atorluarneqaruni aningaasarsiornikkut inuiaqatigiinnilu ingerlatsinikkut uummarissaataalluarumaartussaq. Aamma eqqarsaatigaara Piareersarfinnik pilersitsiortorneq, nalitsinni sulianik ilinniagaqarnerup tungaatigut sakkortuumik piumasaqarfiusumi piareersarfiuinnarani sulilersitseqqinniarnermi alloriarfittut pingaaruteqalersussaq. Suliniutit taakkua iluatsinnissaannut angusaqarfiulluarnissaannullu 2006-imittaaq peqataasoq imminut iluaqusissaaq inuiaqatigiillu iluaqusissallugit. Ukiortaassami pilluaritsi Lars Karl Jensen |
