|
Nuuk d. 22. novembari 2006 Avatangiisit eqqarsaatigalugit iliortoqartarnissaanik kaammatuutaasoq Nunatsinni suliffeqarfinnut tamanut nassiussuunneqartoq sapaatip akunnerini tulliuttuni apuuffissaminut apuutissaaq. KANUKOKAp siulittaasuata Lars Karl Jensenip Nunatsinni allaffimmiut tamaasa qinnuigai igitassat avatangiisinut ulorianaateqarsinnaasut eqqaavinnut nalinginnaasunut igittaqqunagit. Tamakku kommunip eqqakkanut immikkoortitserivianut tunniunneqartussaapput. Eqqakkat avatangiisinut uloriarnarsinnaasut suuppat? Kikkunnulluunniit ajornannginnerussammat KANUKOKAp kommunini avatangiisit pillugit suliniartui eqqaamassutissamik suliaqarsimapput, tassani erseqqissumik nalunaarsorneqarsimallutik eqqakkat suut eqqaaviinnarnut iginneqassanngitsut. Allagartaq akimut ersittumik qeratasuumik qaleqarpoq, allaffimmi sumulluunniit erseqqissumut nivinngarneqarsinnaalluni. Eqqakkat avatangiisinut ulorianarsinnaasut sumut tunniunneqassappat? Eqqakkat avatangiisinut ulorianarsinnaasut kommunit eqqakkanut immikkoortiterivianut tunniunneqartussaapput. Aasiaat, Ilulissat, Maniitsoq, Sisimiut, Qaqortoq aamma Nuuk eqqakkanut immikkoortiteriveqarput. Kommunit sinneri suli immikkoortiteriveqanngillat. Kommunimi teknikikkut aqutsisoqarfimmut saaffiginnikkuit, eqqakkat avatangiisinut ulorianarsinnaasut sumut tunniunneqassanersut paasitinneqarsinnaavutit. Eqqakkat avatangiisinut ulorianarsinnaasut sooq immikkoortissappat? Eqqakkat avatangiisinut ulorianarsinnaasut assigiinngitsuupput mingutsitsisuullutillu. Ingammik saffiugassat oqimaatsut – soorlu AQERLOQ, CADMIUM aamma KVIKSØLV uumasuni nerisaqaqatigiinni katersuukkiartortarput ingammillu uumasuni imarmiuni annertusiartortarlutik. Cadmium uumassusilinnut tamangajalluinnarnut toqunartuuvoq. Cadmium imermit, naasunit uumasunillu toqqaannartumik timitsinnut pulasarpoq. Kviksølv aqerlorlu sianiutitsinnik qaratsatsinnillu akornusiisarput, annerusumik qitornassani piarassanilu. Kviksølv aqerlorlu annerusumik immami uumasut neqaannit aalisakkallu nerpiinit pisarpavut. Atortukut innaallagissamoortut mingutsitsinerpaasarput Atortukut innaallagissamoortut batteriikullu saffiugassanik oqimaatsunik akullit eqqakkat nalinginnaasut ikuallaqatigigaangamikkit sumiiffinni assigiinngitsuni silaannarmiilersarput. Taassuma saniatigut atortut innaallagissamoortut ikuallannaveersaataat atortuni taamaattuni tamangajanni nassaassaasoq dioxinimik kræfteqalissutaasartumik qinngornermik annerusumik aniatitsilersarpoq. Atortukut innaallagissamoortut kanngussattaat dioxinimik pilersoqarneranik sukkatsisaasarpoq. Taamaattumik oqaatigisariaqarpoq saffiugassat oqimaatsut uumaatsulerinermilu akuutissat imermut silaannarmullu akuliukkiartuaarsinnaasut atortukut innaallagissamoortut ikuallanneqaraangata, saviminernulluunniit eqqaavinni uninngasuutigineqaleraangata. Taammaammat kommunini eqqagassanik pitsaanerusumik avatangiisinullu pitsaanersumik iliuuseqarfigisarnissaannik ikiorsiiniarneq pissusissamisoorpoq.
Qujareerluta
Martha Labansen
Pisortaq
(Kalaallit Nunaata inuisa 59%-ii periarfissaqarput eqqakkanik avatangiisinut uloriarnarsinnaasunik eqqakkanik immikkoortiterivimmut tunniussinissaminnut. Tassa immikkoortitserivimmut tunniussisinnaapput Qaqortumi (3.206-it), Nuummi (14.583-it), Maniitsumi (2.847-t), Sisimiuni (5.399-it), Aasianni (3.086-it) aamma Ilulissani (4.511-t) - katillugit inuit 33.632-it. Eqqakkanik immikkoortiterivik sumiittoq nalugukku kommuninni teknikikkut aqutsisoqarfik saaffigiuk.) |
