Ikaarsaariarnermi ataatsimiititaliat
Borgmesterit kommunaldirektørillu marts 2006-imi ataatsimiinnerminni aalajangernerat tunngavigalugu KANUKOKA-p siulersuisuisa pilersippaat sumiiffinni oqartussaaqataaneq aqutseriaatsillu pillugit suleqatigiissitaq.
Suleqatigiissitap taassuma Aaqiissuussaanermut Isumalioqatigiissitat isumaliutissiissutaat aallaavigalugu sulereerlutik ikaarsaariarnermi ataatsimiititaliat pillugit nalunaarusiorpoq.
Aaqqissuussaanermut Isumalioqatigiissitat isumaliutissiissumminni inassutigaat 2007-imi ukiakkut kommunalbestyrelsinut 2009-2013-imi atuuttussanut qinersisoqassasoq. Kommunit nutaat tamarmik immikkut ataatsimoortumik qinersiviussapput. Kommunalbestyrelsinullu qinersineq qinersivinni nutaani toqqaannartumik qinersinerussaaq. Kommunalbestyrelsit nutaat 1. januaari 2008-miit 1. maaji 2009-mut ikaarsaariarnermi ataatsimiititaliatut atuutissapput kommunalbestyrelsit maanna atuuttut ingiaqatigalugit.
Aaqqissuussaanermut Isumalioqatigiissitat aamma inassutigaat ikaarsaariarnermi ataatsimiititaliat kommunalbestyrelsillu maanna atuuttut akisussaaffii imaalillugit killiffissalersorneqassasut aalajangigassat piffissaq qinersiviusoq maanna atuuttoq akimorlugu sunniuteqartussat ikaarsaariarnermi ataatsimiititalianit aalajangiiffigineqartartussanngorlugit.
Aaqqissuussaanermik iluarsaaqqinnissaq pillugu politikkikkut oqallinnermi malunnarpoq ikaarsaariarnermi ataatsimiititaliat kommuninik kattussuinissaq sioqqullugu sulerinissaat nalornissutigineqartoq. Kommunit kattunnissannut tunngatillugu ulluinnarni sulinermi aaqqissuussaanermilu aalajangigassat pillugit Inatsisartut aalajangiiffigisassaattut siunnersuummi, kommuninullu tusarniaassutigineqartumi Naalakkersuisut innersuussutigaat kattunnissamut ataatsimiititaliat maannakkut kommunalbestyrelsiusunit toqqarneqassasut.
Sumiiffinni oqartussaaqataaneq aqutseriaatsillu pillugit suleqatigiissitap ikaarsaariarnermi ataatsimiititaliat pillugit eqqartuipput.
Suleqatigiissitap ataatsimut innersuussutai makku KANUKOKA-p siulersuisuisa isumaqatigaat
Kommunit kattunissaat sioqqulugu aalajangigassat pingaarutillit amerlasuut aalajangerneqartussaanerat pissutigalugu ikaarsaariarnermi ataatsimiititaliat pisariaqartut nalilerneqarpoq, taakkua qulakkiissammassuk aalajangigassat innuttaasut isummersimanerat tunngavigalugu aalajangerneqarnissaat, taamaammallu aalajangikkat taamaattut sivisuumik atuussinnaassallutik.
Aaqqissuussaanermut Isumalioqatigiissitaq siunersuuteqarpoq, ikaarsaariarnermi ataatsimiititaliat januaarip aallaqqaataani 2008-mit atuutilissasut, taamaalillutik ikaarsaariarnermi ataatsimiititaliat ukiup aappaata affangajaa atuuttussanngussapput. Danmarkimi misilittakkat takutippaat, Bornhomimi ukiup affaani atuunnerat sivikippallaartoq, kommunillu sinnerisa kattunnissaanni ukioq ataaseq atuunnissaat sivisuallaarsorineqarluni. Suleqatigiissitap innersuussutigaa februaari 2008-mi kommunalbestyrelsinut qinersineqassasoq. Qinigaasut aggustip aallaqqaataa 2008-mit maannakkut qinigaaffiup naaneranut ikaarsaariarnermi ataatsimiititaliatut sulissapput, tamatumalu kingorna kommunalbestyrelitut sulilissallutik.
Inussiarnersumik inuulluaqqusillunga
Lars Karl Jensen
Siulittaasoq
