Pineqartut 19. decembari 2006 ataatsimiinnerminni aaliangerpaat Ilinniarfissuaq, Inerisaavik Ilinniartitaanermullu Pisortaqarfik piumaffigineqassasut kingusinnerpaamik 2007-ip affaata siulliup qaangiutinnginnerani iliuusissanik siunnersuusioqqullugit. Tamanna pitinnagu illoqarfiit nunaqarfiillu sapinngisamik amerlasuut tikillugit pisariaqartitsinerinik paasiniaavigeqqaarneqassapput. Paasiniaanerni ilanngullugu misissorneqassaaq ukiuni kingullerni timelæreritut sulisooreersut qanoq iliorluni ilinniartitsisumut ilinniaqqissinnaanerinik periarfissiissuteqarsinnaanissaq.

Ilanngullugu aamma misissorneqassaaq inersimalereersut ilinniarnertuunngortissinnaanerinik periarfissat. Eqqarsaataavoq Ilinniarnertuunngorniarfinni inersimasunik ukiup ataatsip ingerlanerinnaani ilinniarnertuunngortitsisarsinnaanissat eqqunneqarsinnaanerat.

Iliuusissat tamakku eqqarsaataapput naluneqanngitsutuut ilinniartitsisunik 400-t pallillugit amerlatigisunik amigaateqartuarneq ilungersunartutut iliuuseqarfigineqartariaqartutullu isigineqarmat.

Ilanngullugu aamma piffissami kingullermi kommunini ajornartorsiutaavoq ilinniartitsisut piffissami sivikitsuinnarmi atorfeqariarlutik ikerinnarmi taamaatiinnariarlutik nuuttartut amerliartornerat.

Itinerusumik paasisaqarusukkuit saaffigiuk: Ilinniartitaanermut Pisortaqarfimmi allaffimmi pisortaq Andreas Olsen oqarasuaat +299 34 57 63.