KANUKOKA’p qorsummik pisiniartarnissamik politikkerisamut peqataajumalluni aalajangerneranut tunngaviuvoq Kalaallit Nunaanniittugut atuisartunut ajunngitsorsiassanik sunik tamanik atuinerujartuinnarnerput, tamatuma kingunerisarlugit eqqagassat avatangiisinullu pitsaanngitsut tamani amerliartuinnartut.
Inuiaqatigiit piniartukkormiuusimariarluta pingaartumik uumassusilinnit nioqqutissiortut pinngortitamilu arrortinneqarsinnaasunik eqqaasut, piffissap sivisunngitsup ingerlanerani inuiaqatigiinngorsimavugut nutaaliaasut, atuisutut ajunngitsorsiassanik suliffissuarni nioqqutissianik atuinitsigut avatangiisinut navianartunik eqqagassiortorujussuit.
Kalaallit Nunaat issittumi Avannarlermi inissisimagami pinngortitami oqimaaqatigiiaannikkut misikkarissuuvoq, tamatumani mingutsitsineq uumasunut inunnullu pingaarutilerujussuulluni. Nioqqutissiat avatangiisinut ajoqusiisarneri ilisimagutsigik sumiiffinni mingutserisuussut, tassa nunaannarmi eqqaavissuit, eqqakkanik ikuallaasarneq, imikumik maangaannaq kuutsitsisarneq il.il. killilersimaarniarsinnaavavut.
Piujuaannartitsinerup tungaanut ineriartorneq aatsaat ukiuni kingullerni aallartissimavoq, ineriartornermilu tamatumani pisortat suliffiutaat sallersaasariaqarput, tamakkunani suliffeqarfiit ataasiakkaarlutik innuttaasullu ataasiakkaarlutik peqataanerat pissusilersuutaallu pingaaruteqarlutik.
KANUKOKA’p Danmarkimi avatangiisinut aqutsisoqarfimmit, Miljøstyrelsen, tapiiffigineqarluni pisortani qorsummik pisiniartarneq pillugu workshop’eqartitsinissaq neqeroorutigaa. Aasianni, Maniitsumi Ilulissanilu marsip qiteqqunnerani workshop’eqartitsisoqassaaq. Nuup Sisimiullu kommuniini marsimi 2005-imi workshop’eqartitsisoqarpoq.
Inussiarnersumik Innuulluarit
Lars Karl Jensen
siulittaasoq
