Kommuninut ataatsimoortumik tapiissutissat

Aningaasarsiornermut naalakkersuisoq Josef Motzfeldt, aamma KANUKOKA-p siulittaasua Lars Karl Jensen 2007-imi kommuninut ataatsimoortumik tapiissutissat pillugit ullumikkut atsioqatigiipput. Ataatsimoortumik kommuninut 2007-imi tapiissutissat 783,9 mio. kr.-ussapput, taakkunanngalu 18,2 mio. kr.-it akit akissarsiallu qaffakkiartornerannut iluarsiissutaallutik.

Illuatungeriit isumaqatigiissutigaat kommunit ilinniartitaanermi suliniutinut aningaasaliissutissaat 38,8 mio. kr.-inut 2007-imi angissusilerneqassasut.

Inatsisartut aalajangernikuupput akileraarutinik akitsuutinillu suliaqarneq aaqqissuuteqqinneqassasoq qitiusumullu katersorneqassasoq 1. januar 2007 aallarnerfigalugu. Illuatungeriit isumaqatigiissutigaat, kommuninut tapiissutit 26,3 mio. kr.-inik ikilisinneqassasut, akileraartarnermi sullissinerup ataatsimut ingerlanneqalernerata kingunerisaanik. Illuatungeriillu aamma isumaqatigiissutigaat kommuninut ataatsimoortumik tapiissutit 8,4 mio. kr.-inik 2007-imi qaffanneqassasut, aningaasanik tigoriaannarnik ingerlatsinerup allanngortinneqarnerata, aammalu ingerlatseqatigiiffiit ilassusikkamik akiligassanneqartarnerisa, ilassutitut akileraartitsisarnerup akileraarpallaartoqarneranilu sullissinermi akisussaaffiup kommuniniit Namminersornnerullutik Oqartussanut nuunneqarnerata kingunerisaannik.

Naalakkersuisut 1. januar 2007 -imiit ingerlatseqatigiiffiit akileraarutaat 35-imiit 30 %-imut appartinniarpaat. Illuatungeriillu isumaqatigiissutigaat ataatsimoortumik tapiissutit 14,5 mio. kr.-inik 2008-imiit qaffanneqassasut kommunit isertitakinnerulernerannut matussutaasumik.

Illuatungeriit isumaqatigiissutigaattaaq ataatsimoortumik tapiissutit siusinaartumik
soraarnerussutisianut, ineqarnermut tapiissutinut, suliffigissaanermi nutaanik
maleruagassiornermut kiisalu meeqqat inuusuttuaqqallu sullinneqarnerannut tunngasutigut
nalimmassarneqassasut. Tamatuma saniatigut illuatungeriit isumaqatigiissutigaat
suliffeqanngikkallarnermi ikiorsiissutit pillugit peqqussummi, pisortanillu ikiorsiisarnermik
peqqussummi inuit ingerlariaqqinnissamut pilersaarusiuunneqartarneranni piumasarisat
pillugit kommunit allaffissornermi aningaasartuutaat matussuserneqassasut.
Ilanngullugu illuatungeriit isumaqatigiissutigivaat, suliffeqanngikkallarnermi peqqussutip
nutaap kingunerisaanik suliffissuarni sulisut suliassaarunnermi angerlartikkallarneqartarnerannut aningaasartuutaat matussuserneqassasut.

Josef Motzfeldt, aningaasarsiornermut nunanullu allanut naalakkersuisoq
Lars Karl Jensen, Kalaallit Nunaanni Kommuneqarfiit Kattuffiat

Annertunerusumik paasisaqarniaraanni saaffigineqarsinnaapput: Aningaasaqarnermut Pisortaq Peter Beck telefon 34 52 01 imaluunniit Pisortaq Martha Labansen telefon 32 21 00

Ulloq 25. septembari 2006 KANUKOKA-p siulittaasuata Lars Karl Jensenip aningaasaqarnermullu naalakkersuisup Josef Motzfeldtip 2007-imi kommuninut ataatsimoortumik tapiissutissanik isumaqatigiissut atsiorpaat.