|
Naalakkersuisut siulittaasuannut Hans Enoksenimut allakkat ammasut napparsimasut paaqqutarisariaqartut napparsimmavinniitinneqarnerinut akit qaffanneqarnerat pillugu Kalaallit Nunaanni inuiaqatigiit iluarsaaqqinnernut annertuunut pisortaqarfiit tamarmik kivitseqataaffigisassaannut isingajalerput. Kingullertigut kommunit Namminersornerullutik Oqartussat ilinniartitaanermut pilersaarutaannut aningaasalersueqataasimapput, tamatuma kingunerisaanik ukiumoortumik kommuninut ataatsimoortumik tapiissutit ukiualunnguit qaangiuppata ukiumut 80 mio. kr.-it tikillugit ikilisussaallutik. Taamaaliortoqarsinnaavoq politikkikkut piumassuseqartoqarnera pissutigalugu, aammali isumaqatigiissuteqartarnikkut aaqqissuussisoqarsimammat Namminersornerullutik Oqartussat kommunillu inuiaqatigiit imminnut napatinnerusinnaanerannut iluaqutaasumik isumaqatigiissuteqartarsinnaanerannut periarfissiisumik. Peqqissutsimut Pisortaqarfiup napparsimasut paaqqutarisariaqartut napparsimmavinniitinneqarnerinut akigititanik 300 procentit sinnerlugit qaffaanissamik naalakkiinera inatsisit isumaqatigiinniartarnernillu aaqqissuussinerit atuuttut qissimillannguarnagit pisimavoq. KANUKOKA-p akerliliigaluarnera Peqqissutsimut Pisortaqarfimmi atorfillit pingaakujullutik itigartippaat, taamatut aamma oqaloqatigiittoqaqqaarnanilu isumaqatigiinniartoqaqqaanngitsorluunniit. KANUKOKA-p erseqqissarusuppaa akigititanik qaffaanermut tunngatillugu ilisimatinneqarnataluunniit tusarniaavigineqaqqaarsimannginnatta. Taama pisoqarpoq naak utoqqarnik paaqqinniffiit il. il. pillugit Inatsisartut peqqussutaanni nr. 11-mi, 30. oktobari 1998-imeersumi, allassimagaluartoq akigititat Naalakkersuisut aamma Kalaallit Nunaanni Kommuneqarfiit Kattuffiata isumaqatigiinniarneratigut aalajangersarneqartassasut.
Aaqqissuussaanermik iluarsaaqqinnissaq ataqqeqatigiinneq tunngavigalugu isumaqatigiinniarnerpassuartigut pisussaavoq, minnerunngitsumik inatsisit isumaqatigiinniartarnernillu aaqqissuussinerit atuuttut ataqqillugit. Taamaattumik KANUKOKA-p naalakkersuisut siulittaasuat kajumissaarusuppaa pissutsit torinngitsut ajorsilluinnartinnagit iliuuseqarfigeqqullugit. |
