|
Nunaqarfinni aqutsisut siulittaasuisa ataatsimeersuarnerata aallartinnerani KANUKOKA-mit oqaaseriumasat Nunaqarfinni aqutsisut siulittaasuisa maani ataatsimeersualerneranni Kalaallit Nunaanni Kommuneqarfiit Kattuffiat sinnerlugu tikilluaqquseqataasinnaatitaagama qujanaq. Naalakkersuisut nunaqarfimmiunik taamatut ataatsimeersuartitsinialersaartut ilisimaleratsigu kommuneqarfiit kattuffiannit naalakkersuisut siulittaasuannut allagaqarsimavugut tulluarnerutillutigu aningaasat ataatsimeersuarnermut atorneqartussaagaluit kommuninut aningaasaliissutigineqarpata nunaqarfimmiullu tusarniaavigineqarnerat kommuninit ingerlanneqarpat – tassami nunaqarfiit kommuninut atammata. Taama oqariarlunga ingerlaannaq oqaatigissavara maanna nunaqarfinni aqutsisut siulittaasui isumasiorlugit ataatsimeersuartitsineq qujarutiinnaratsigu – tassami inuiaqatigiinni aaqqissuussinerup taama annertutigisumik allannguuteqartinneqarnissaa pilersaarutigineqartillugu tamanna pissusissamisoormat pisariaqarlunilu. Tassami aaqqissuussaanermik iluarsaaqqinnissap inuiaqatigiinni assigiinngitsunik soqutigisalinnit aammalu nunatta ilaani sumiluunniit najugaqartunit paaseqatigiissutigalugulu suleqatigiissutigineqarnissaa pisariaqartorujussuuvoq. Nalunngilarput pisortat ingerlatsiviisa aaqqissuussaanerannik iluarsaaqqinnissaq pisariaqalersimasoq – tassa aaqqissuussinerit suleriaatsillu pisoqalisut sukumiisumik nutartertariaqalermata aammalu suliassanik nammagassanillu agguataareqqittoqartariaqalermat Namminersornerullutik Oqartussat ingerlataasa ilarpassuisa nunap immikkoortuini oqartussaasunut, imaappoq kommuninut, nussorneqarnerisigut. Tamanna qangali piumasaavoq pissusissamisoortoq piviusunngortinneqartariaqalersorlu. Nalunngilarputtaaq iluarsaaqqinnissaq tamanna tamakkiisumik ingerlanneqassappat aammattaaq innuttaasut oqartussaaqataaneranni aaqqissuussinerit attunngitsoorneqarsinnaanngitsut. Kommuneqarfiit kattuffianni pingaartitaraarput innuttaasut oqartussaaqataanerata inerisarneqartuarnissaa – piffissamut inuuffigisatsinnut periarfissarititaanullu naleqqussarlugu, minnerunngitsumillu: isumaqarluartumik imaqarluartumillu ingerlanneqarnissaa isumagiuarlugu. Taama oqaaseqarlunga kommuneqarfiit kattuffiat sinnerlugu ataatsimeersuarneq manna kissaappara isummersorfiulluaqqullugu, ingerlalluaqqullugu angusaqarfiulluaqqullugulu.
Katrine Larsen Lennert |
