Kalaallit Nunaanni kommunit avannarlersaanni pissutsit ingerlanerat kommuneqarfiit kattuffiata malinnaaffigisimavaa, matumuunalu oqaatigerusullugu aningaasaqarnikkut ilungersunartorsiorneq ajoraluartumik taamaallaat Qaanaap kommuniani atuutinngimmat, aammali kommunini minnerusuni allani atuummat.
Nalunngilarput kommunip 2003-mi Naalakkersuisut kommunip aningaasaqarnikkut sanngiilliorneranik ilisimatissimagai erseqqissumillu nassuiaassimagai inuuniarnikkut atugarisat taamalu kommunip aningaasaqarnera nukittorsarneqassappata sutigut suliniuteqartariaqarnermik.
Tassani kommunimit taaneqarpoq Pittuffimmi sakkutooqarfimmi sulisut akileraarutaasa maannamut tamakkiisumik nunatta karsianut nakkartinneqartartut ilaat kommunimi ineriartortitsinermut aningaasaleeqataassutigineqartariaqaraluartut. Tamatumani KANUKOKA-p kommune isumaqatigaa.
Manna iluatsillugu KANUKOKA-p Avanersuarmi politikerit atorfillillu kajumissaarusuppai suleqatigeeqqullugit ilungersunartorsiornerminnilu isumatusaarlutik pitsaanerpaamik naammassisaqarniaqqullugit.
Inussiarnersumik
Karl Lyberth
siulittaasuugallartoq
