Kommuneqarfiit kattuffianni siulersuisut iluarisimaarlugu maluginiarpaat apeqqummi tamatumani pingaaruteqaqisumi kommunit anguniakkatigut pingaarnerusutigut nakimassutaarussimasut kiisalu ataasiunerusumik siunnerfeqalerlutik.
Tassa kommunit kattussuunnissaat siunissami aqqutissaasutut maanna katersuuffigineqarpoq suliassanik akisussaaffinnillu Namminersornerullutik Oqartussanit tigusinissamut qangalili kissaatigisaasumut tunngavissarpiatut isigineqarluni.
Kommuneqarpoq kattutinngikkaluarluni annertusisamik suleqatigiinnikkut ingerlariaqqittariaqarnermik aalajangiusimannittunik. Taamatut immikkut isummersinnaaneq pisinnaatitaaffiuvoq. Maluginiarparpulli pituttorsimanerusumik suleqatigiinnerup periarfissaqartinneqarnissaanik kissaateqartut aamma kingusinnerusukkut kattussinnaanermik mattussiumanngimmata.
Naalakkersuisut siulittaasuata Hans Enoksenip ataatsimiinnermi oqaasiisigut maluginiarparputtaaq naalakkersuisooqatigiit aaqqissuussaanermik iluarsaaqqinnerup qanoq piareersarneqarnissaa ikaarsaariarfigineqarnissaalu pillugit kommuneqarfiit kattuffiata isumaanik tunngavilersuutaanillu naaperiaasut. Tamanna aamma iluarsaaqqinnissami suleqatigiilluarnissamik neriullualersitsivoq.
Borgmesterit kommunaldirektørillu ataatsimiinneranni ataasiarani erseqqissarneqarpoq siunniunneqartutuut 2009-miit aaqqissuussaanermik iluarsaaqqinnissaq soorunami suut tamarmik ataatsikkut iluarsinerannik kinguneqa rnavianngitsoq. Iluarsaaqqinnissarli tunngavissiissaaq nukiit aningaasallu iluaqutaanerusumik ataqatigiinnerusumillu atorneqalernissaannut. Piviusorsiortumik taamatut eqqarsartoqarnera toqqissisimanartipparput.
Aaqqissuussaanermik iluarsaaqqinnissami suliassat isumagisassallu unamminiarnartut amerlassaqimmata sulilluataarnissaq, iluarsisassanik qulaajaalluarnissaq kiisalu misilittakkanik paasisanillu kommuninik allanik avitseqateqartarnissaq iluarsaaqqinnissap ajunngitsumik aallartinnissaanut aalajangiisuussaaq. Soorlumi ataatsimeeqataasut ilaat ima oqartoq: "Qamutit aallareerput, noqittuunata ingerlaniarta!"
Kattuffimmi siulersuisut sinnerlugit
inussiarnersumik
Lars Karl Jensen
siulittaasoq
