Hans Enoksen aamma Søren Alaufesen 2008-mi kommuninut tapiissutissanik isumaqatigiissutip atsiorneqarnerani.

Kommuninut ataatsimoortumik tapiissutit 2008-mi 761,5 mio. kr.-iussapput, taakkunannga 22,4 mio. kr.-it akinut akissarsianullu nalimmassaataallutik.

Kommunit ilinniagaqarsimassutsip qaffassarneqarnerani 2008-mi aningaasaliissutissaat 64,7 mio. kr.-iussasut atsioqatigiittut isumaqatigiissutigaat.

Utoqqalinersiat pillugit inatsisartut peqqussutaat nutaaq utoqqalinersianut annertussuserititat qaffanneqarnerannik imaqarpoq. Tamanna kommunini akileraarutitigut isertitaqarnerulerujussuarnermik kinguneqarpoq. Tamanna tunuliaqutaralugu kommuninut ataatsimoortumik tapiissutit 2008-mi 26,7 mio. kr.-inik ukiunilu tulliini taamatuttaaq ikilisinneqarnissaat atsioqatigiittut isumaqatigiissutigaat.

Najukkani pinaveersaartitsinermut siunnersorteqarneq 1997-imi siullermik misiligutitut kiisalu 1998-imit suliniutitut pinaveersaartitsinermi siunnersorteqarnertut aallartinneqarpoq. Pinaveersaartitsinermi siunnersortit 2006-imi aallartinneqartumik 2007-illu naanerani naammassineqartussamik ilinnialeruttorput. Ilinniartitaanerup naanerani pineqartumut aningaasaliissutit Paarisamit kommuninut nuunneqarnissaat isumaqatigiissutaavoq. Tamanna tunuliaqutaralugu kommunit 2008-mit 1,8 mio. kr.-inik taarsiiffigineqarnissaat isumaqatigiissutigineqarpoq.

Ingerlatseqatigiiffiit akileraarutaasa 35-mit 30 %-imut 1. januar 2007-imit appartinneqarnerisa kingunerisaannik kommunit 2008-mit 14,5 mio. kr.-inik taarsiiffigineqarnissaat susassaqartut isumaqatigiissutigaat. Tamanna ukiumut missingersuusiorfiusumut 2007-imut kommuninut ataatsimoortumik tapiissutit pillugit isumaqatigiissuteqarnermi isumaqatigiissutigineqarpoq.

Illuatungeriit isumaqatigiissutigaat meeqqanik inuusuttunillu paaqqinnittarfiit januaarip aallaqqaataani 2009-mi kommuninit akisussaaffigineqalernissaasa piareersarneqarnera aallartissasoq. Paaqqinnittarfiit ingerlanneqarnerat kommuninit aningaasalersugaareerpoq, kommuninilu suliassaqarfimmi tamatumani piginnaasat nukittorsarneqangaatsiassapput paaqqinnittarfinni maanna sulisuusut aamma meeqqanik inuusuttunillu sullissisut allat akuleriissinneqarpata.

Tamatuma saniatigut ataatsimoortumik tapiissutit siusinaartumik soraarnerussutisianut, ineqarnermut tapiissutinut kiisalu meeqqanut inuusuttunullu tunngasunut tunngatillugit iluarsineqarnissaat susassaqartut isumaqatigiissutigaat. Aammattaaq pisortanit ikiorsiissutit pillugit inatsisartut peqqussutaanni nutaami ilaatinneqartoq naapertorlugu pisortanit ikiorsiissutisiallit qaniginerpaasat ilineqarnerannut atatillugu angerlarnerannut aningaasartuuteqarnermut kommunit taarsiiffigineqartarnissaat atsioqatigiittut isumaqatigiissutigaat.

Isumaqatigiissut atsiorneqartoq uani aamma www.nanoq.gl -imi atuarneqarsinnaavoq.

Sukumiinerusumik paasisaqarusunnermi saaffigisassat: Aningaasaqarnermut Pisortaqarfimmi pisortaq Peter Beck, oqarasuaat 34 52 01 imaluunniit KANUKOKA-mi pisortaq Martha Labansen, oqarasuaat 32 21 00.