Ukiorpassuarni Nuup Kommuniani borgmesteritut ukiualunnilu kommuneqarfiit kattuffianni siulittaasup tulliatut Agnethe Davidsen innuttaasut sumiiffimminni oqartussaaqataanerata ineriartortinneqarnissaanik sorsuutiginnilluni saqqummertarsimavoq.
Kommuneqarfiit kattuffiannut aallartitat ataatsimiittarnerini aammalu borgmesterit kommunaldirektørillu ataatsimiittarnerini Agnethe Davidsen ilisimaneqarpoq kommunit iluamik oqartussaaffilerneqarnissaat pillugu kimittuunik oqaaseqartarnermigut. Taamaalilluni aamma pisortat suliassaqarfiisa aaqqissuussaanerannik iluarsaaqqinnissaq maanna piareersarneqaleruttortoq pillugu kingullertigut pingaartillugu taakkartugaraa kommunit isumaginninnermut tunngasuinnarnik tigusissanngitsut, aammali inuussutissarsiornikkut sanaartukkatigullu suliassanik aningaasarsiornikkut ineriartuutissanik tigusissasut.
Agnethe Davidsenip toquneratigut annaasaqarpugut nalinganik taarserniassallugu imaannaanngitsuusussamik. Eqqarsaataali siuliani taaneqartut KANUKOKA-p suleqataaffigissavai.
Ilaqutaasunut qimataasunut misiginneqataavugut.
Agnethe Davidsenip eqqaaneqarnera ataqqinartuuli.
Søren Alaufesen
Siulittaasoq
