Tallimanngormat 5. oktobari Qanoruukkut ilisimatitsissutigineqarpoq akiliisitsiniartarnerup qitiusumit ingerlanneqalernissaanik pilersaarutit Kalaallit Nunaanni Kommuneqarfiit Kattuffiat KANUKOKA isumaqatigalugu suliarineqarsimasut.
KANUKOKA-p aallaqqaammulli erseqqissartuartarsimavaa inkassomut tunngatillugu suliassaqarfik kommuniniiginnartariaqartoq. Pisortanut akiitsut akilersinniarneqartarnerat pinaveersaartinneqarnissaallu pillugit inatsisip allannguutissaatut siunnersuutip tusarniaassutigineqarneranut akissutitsinni erseqqissarneqarpoq suliassaqarfimmi tamatumani sukaterinissaq kommunerujussuanngortussani isumagilluarneqarsinnaanerpaassasoq aammalu KANUKOKA-p kommunillu Akileraartarnermi Pisortaqarfiup qitiusumit ingerlatseriaasissamik siunnersuutaata iluaqutaasinnaanera qularigaat. Tassami siunnersuut naapertorlugu maanna sulisuusut allanik sulisitsisoqaleraluarlutik maannamut suliffigisaminniiginnassapput, tamatumali kingunerisaanik akiliisitsissutigisartagaat ukiumut 36 mio. kr.-inik amerlissallutik.
KANUKOKA kommunillu isumaqarput kommunit kattunnissaat immini akiliisitsiniartarnermut nukittorsaataassasoq, tamatumani aamma nunaqqatigiinni pissutsinik ilisimaarinninneq taakkununngalu attaveqarneq attatiinnarneqassammata. Qarasaasiaqarnikkut naammassisaqarluarnarnerusumik aaqqissuussisoqarpat pisortanullu akiligassat tamaasa pillugit paasissutissanik katersuiffeqalerpat suliassaqarfiup kommunerujussuanngortussanut sisamanut siammarlugu inissisimatiinnarnissaa allaffissornikkut akikinnerpaallunilu naammassisaqarluarnarnerpaassaaq.
KANUKOKA-p aaqqiissutissatut siunnersuut taanna naalakkersuisunut ilaasortat suliassaqarfimmut tamatumunnga oqartussaasut ukiup affaata kingulliup ingerlanerani atuussimasut sisamaasut ilaannut pingasunut saqqummiussimavaa, aammalu naalakkersuisunut ilaasortamik maanna oqartussaasumik oqaloqatiginnissutigerusullugu. Isumaqataalluinnarpugut suliassaqarfimmi sukaterisoqartariaqartoq, oqartoqarsinnaanngilarli qitiusumit ingerlatsilernissamik pilersaarutit KANUKOKA isumaqatigalugu ingerlanneqarsimasut.
Inussiarnersumik
Søren Alaufesen
