Atuarfimmut tunngasunik saqqummersitsinerup
”Naleqqiiffiup” ammarneqarnerani KANUKOKA-p
siulittaasuata Lars Karl Jensenip oqalugiaataa

 

Ilinniartitaaneq pisinnaasanillu inerisaaneq inuiaqatigiinni ineriartornermut atugarissaarnerulernissa­mullu tunngaviusarput aammalu nammineq inuttut suliffimmilu ineriartornissamut tunngaviliisarlutik.

 

Siunissami inuiaqatigiit tunngavissaata qarmarneqarnerani Atuarfitsialak atortussanut pingaarnernut ilaavoq, taamaattumillu atuarfeqarnermi maannakkorpiaq suliassat imaannaanngitsut amerlaqaat.

 

Atuarfik inuiaqatigiit ingerlataat tamatigoortuusussaavoq atuartut ataasiakkaat namminneq pisinnaa­saminnik nukittuffigisaminnillu ineriartortitsinissaannut inissaqartitsisussaq. Atuagarsornikkut poqersunut ineriartorfissaqartitsilluassaaq, aammali atuartunut allatigut soqutigisalinnut nukittuffeqartunullu piginnaanngorsarfiussalluni.

 

Kinguaariinnik tulliuttunik ilinniartitsinermi suliassaq pingaartoq tamanna ingerlatissagaanni piginnaaneqarluartunik naammattunik atuartitsisussaqartariaqarpoq.

 

Ilisimavarpulli ullutsinni ilinniartitsisussaaleqineqangaatsiartoq, ilinniartitsisullu naammannginnerat tamanna Atuarfitsialaap ineriartoqqinnissaanut akornutaasoq.

 

Taamaattumik ilinniartitaanermut naalakkersuisoq Tommy Marø uangalu 2006-imi decembarip qiteqqunnerani ataatsimiippugut ilinniartitsisussaaleqineq aammalu ukiup atuarfiusup nalaani ikerinnakkut ilinniartitsisut nuuttarnerpassuisa pakkersimaarneqarnissaannik kissaatigisaq oqaloqatigiissutiginiarlugit.

 

Ataatsimeeqatigiinnitta malitsigisaanik suleqatigiissitaliortoqarpoq ilinniartitsisussaaleqinermik sammisaqartussamik, suleqatigiissitami peqataallutik Ilinniarfissuup Inerisaaviullu pisortaat aammalu KIIIP-imi KANUKOKA-milu atorfillit.

 

Siunertaavoq suleqatigiissitaq iliuusissanik inassuteqarluni aasaru juunip qiteqqunnerani saqqummiussaqarumaartoq.

 

Suleqatigiissitap maannamut nalunaarsugai naapertorlugit ukiumi atuarfiusumi matumani ilinniartitsisutut atorfiit 356-it inuttaqanngillat.

 

Taamaattumik aamma timelærerit ilinniagaqarsimassusiat misissorneqassaaq, taamaalilluni timelærerit ilinniakkamikkut qaffannissaannik neqeroorfigineqarsinnaanissaat tamatumalu qanoq atsigisumik aallunneqarsinnaanera misissorneqarniassammat – tamannalu aqqutigalugu ilinniartitsisussaaleqineq ilaatigut iluarsineqarsinnaaniassammat.

 

Kisianni ilinniartitseqqinnerit kisiisa atorlugit ilinniartitsisussaaleqinerup millisinniarneqarnissaa isumaliutigineqanngilaq.

 

Taamaattumik suleqatigiissitaq aamma misissueqquneqarsimavoq ilinniartitsisut akissarsiaqarlutik sulinerata ilaa qanoq atsigisoq atuartitsinermut atorneqartarnersoq ilaalu qanoq atsigisoq suliassanut allanut atorneqartarnersoq, suliassallu tamakku qanoq atsigisumik ilinniartitsisutut ilinniarsiman­ngitsunit suliarineqarsinnaanersut siullermik isumaqatigiissutit atuuttut iluanni, siunissarli ungasinnerusoq eqqarsaatigalugu ilinniartitsisut kattuffiannik isumaqatigiissuteqarnikkut.

 

Misissuinerugallartutigut paasinarpoq taamatut allanngortiterisinnaagaanni ilinniartitsisussaaleqineq millisinneqarsinnaasoq.

 

Ilinniartitsisut Kalaallit Nunaanni inuiaqatigiit ineriartortinneqarneranni ingerlatseqataasutut pingaaruteqartutut KANUKOKA-p isigai. Taamaattumik neriuutigaara taamatut ilinniartitsisussaaleqinerup oqinnerulersinniarneqarnerani iliuutsinut ilinniartitsisut kattuffiat IMAK peqataalluarniarumaar­­toq – taamaalilluni aamma Kalaallit Nunaanni atuarfiup meeqqanut ajunngitsussaq pillugu iluatsilluarnissaanut alloriarsinnaaniassagatta.

 

Taamaattumik atuarfimmut tunngasunik saqqummersitsinerup ingerlalluarnissaanik pissarsiaqarfiulluarnissaanillu kissaappassi.

 

Ataatsimeersuarneq pillugu IMAK-ip tusagassiorfinnut nalunaarutaa atuarumallugu una tooruk