Borgmesterit kommunaldirektørillu 25.-26. oktobari 2007 ataatsimiinnerannik eqikkaaneq
Ataatsimiinnermi saqqummiussuunneqartut tunngavigalugit oqallinnerni makku pingaartumik maluginiarnarput:
-
Kommunit kattunnissaminnut piareersarnerat ingerlalluarpoq. Tamanna erserpoq ullormi ataatsimiiffiusumi siullermi kommuninngortussanit sisamaasunit nalunaarutigineqartunit qiimmaallannartunit.
-
Kommunit kattunnerisa kingornatigut innuttaasut qanimut oqartussaaqataanerata ineriartortillugulu atatiinnarneqarnissaa pingaartinneqarpoq. Inatsisartut ataatsimiititaliaata nunaqarfinni aqutsisut atatiinnarneqarnissaannik inassuteqarnera qujamasuutigineqarpoq. Illua’tungaatigulli sumiiffinni sinniisut pilersinneqarsinnaanerannik isumap ataatsimiititaliamit itigartinneqarsimanera nuannarineqanngilaq – tassa sumiiffinni sinniisut aamma illoqarfinni qanimut oqartussaaqataanerup ineriartortinneqarnissaani sakkussatut iluatinnartuummata. Tamanna Inatsisartunut allakkatigut ullumi nassiunneqartutigut erseqqissarneqarpoq.
-
Suliassaqarfinnik Namminersornerullutik Oqartussanit kommuninut nuunneqartussanik qulaajaanerup pilersaarutit malillugit kinguartoornertaqanngitsumillu ingerlanneqarnissaa ataatsimiittunit pingaartinneqarpoq. Suliassaqarfiit inuussutissarsiornermut sanaartornermullu tunngasut kommuninit tiguneqarnissaat aalajangiusimaneqarpoq, tamatumuuna kommuniulersussat aningaasatigut isertitaqarnissaat qulakkeerneqassammat.
-
IT-mut tunngatillugu isuma ataasiusoq manna ataatsimiinnermi erseqqippoq: Qarasaasiaqarnikkut aaqqissuussineq innuttaasut sullinneqarnerannik pitsanngorsaanissamut allaffissornermillu pisariillisaanissamut pingaaruteqaqimmat qarasaasiaqarnermi ataasiusumik systemeqarnissaq aalajangiusimaneqarpoq. IT-mik aaqqissuussinermi aningaasatigut ingerlatsinerup sapanginneqannginnissaa nakkutigilluarneqarnissaalu kissaatigineqarpoq.
Tamakkua saniatigut ataatsimiinnermi makkuttaaq maluginiarnarput:
-
Takorluukkat kommunit kattunnissaannut killeqaratik tamatuma ungataani aamma ineriartoqqinnissamik takorluuinerupput, soorlu ilinniartitaanerup nunanik allanik attaveqarnikkut ineriartortinneqarnissaanik anguniagaqarnikkut.
-
Ikaarsaariarnermi ataatsimiititaliat kingorna kommunalbestyrelsinngortussat aallartilluarsinnaaqqullugit piareersaalluarneqarnissaat pingaartinneqarpoq.
-
Kommunini sulisut akissarsiaqartitaanerannut tunngatillugu kissaatigineqarpoq akissarsiatigut naleqqussaanissaq nalimmassaanissarlu siunertaralugit kommunit sunniuteqarsinnaanerulernissaat.
Ataatsimut oqaatigissagaanni malunnarpoq innuttaasut sullinneqarnerannik pitsanngorsaanissaq allaffissornikkullu pisariillisaanissaq siunertaralugu Kalaallit Nunaanni kommunit pisortat ingerlatsineranni aaqqissuussaanermik iluarsaaqqinnissamut alloraqatigiillutik piumassuseqarluartut.
Inussiarnersumik
Søren Alaufesen
KANUKOKA-p siulittaasua
