Ataatsimiinnermi sammisassaq pingaarneq aamma tamatumuuna tassaavoq aaqqissuussaanermik iluarsaaqqinnissaq kommunillu kattunnissaat. Soorlu programmimi www.kanukoka.gl/12739-imi aaneqarsinnaasumi atuarneqarsinnaasoq, nunap immikkoortukkuutaarluni oqallittoqartussaavoq ataatsimoorlunilu ilisimatitseqatigiittoqartussaalluni kattunnissamut piareersaatit pillugit. Oqaluuserisassami immikkoortumi ”Kommunerujussuassanut piareersarnerup killiffia”-ni kommuninngortussani peqatigiittussat akunnerminni oqaloqatigiissapput qanoq ingerlariaqqinnissartik pillugu.
Naalakkersuisut siulittaasuat Hans Enoksen qaaqquneqarsimavoq aaqqissuussaanermik iluarsaaqqinniarnerup killiffianik Namminersornerullutik Oqartussat tungaanniit nassuiaateqarniassammat ullormi ataatsimiiffiusumi siullermi.
Ataatsimiinnissamut programmip imarisai allat politikkikkut allaffissornikkullu apeqqutinik pingaartunik kommunit ukioq manna attuumassuteqarfigisaannik takussutissiipput. Tamatumani ilaatigut pineqarput akileraartarnermi sulianik qitiusumit maanna ingerlatsilerneq aammalu akiliisitsiniartarnermi qitiusumit ingerlatsilernissamik pilersaarutit. Aamma nukissiuuteqarneq inuussutissarsiutinullu tapiissuteqartarneq pillugit naalakkersuisut pilersaarutaat kommuninut soqutiginaateqartorujussuupput. Taamaattumik aningaasaqarnermut naalakkersuisoq Aleqa Hammond aamma inuussutissarsiornermut naalakkersuisoq Siverth K. Heilmann qaaqquneqarsimapput tamakku nassuiaateqarfigeqqullugit.
Minnerunngitsumillu pisortat kiffartuussinerat qarasaasiaqarnerlu ullut taakkua marluk ingerlaneranni sammisassanut pingaaruteqartunut ilaapput.
Inussiarnersumik
Søren Alaufesen
KANUKOKA-p siulittaasua
