Batteriikunik kommunit eqqakkanik immikkoortiteriviinut tunniussuillaqqissivippugut. Kisianni elektronikikut batteriitulli avatangiisinut navianartigaat. Taamaattumik kommunit batteriikunut elektronikikunullu mikisualunnut ikioraavissanik niuertarfinni ersiinnartunilu allani ulluni makkunani inissitsiteripput.
Batteriit tunniussigik – taama taallugu paasisitsiniaanerup ersersippaa inuit eqqakkanik avatangiisinut navianartunik immikkoortitereqataarusuttut. Kommunit 2004-mi batteriikut akkumulatorikullu 134 tonsit passutassanngorlugit nunanut allanut nassiussorpaat, 2006-milu 129 tonsit taamaaliorneqarput.
Kisianni tassa batteriit kisimik avatangiisinut navianartunik akoqanngillat. Qarasaasiat, oqarasuaatit angallattakkat, naqitsissutit printerit, pinngussat, maskinat igaffimmi atortut, nipilersukkanik tusarnaarutit atorunnaarsut aamma avatangiisinut navianartuupput. Atortorissaarutit elektroniskiusut innallagiartortullu amerlanerujartuinnartunik pigisavut maani nunatsinni nunarsuarmilumi tamarmi ajornartorsiutaaleriartuaaginnarput.
Kalaallit Nunaanni Naatsorsueqqissaartarfiup paasissutissiai naapertorlugit qarasaasiat oqarasuaatillu 29.775 kg 2004-mi avataaniit eqqussuussimavavut. Tamakkua 2005-imi 32.049 kg-nngorsimapput. Kisitsisit ukiuni arlaqalersuni alliartuaaginnarsimapput, 2006-imullu tunngatillugu kisitsisaatigineqarallartut takutippaat amerlanerujartuinnartunik eqqussuisugut.
Elektronikkitaat amerlanertigut sananeqaatinit assigiinngitsorpassuarnit katitigaasarput. Tamakkua ilagaat saffiugassat oqimaatsut kviksølv, aqerloq, cadmium aamma krom, aamma sananeqaatit halogenitalinnik taaneqartartut soorlu CFC, ikuallannaveersaatit bromerikkat, PCB aamma PVC avatangiisinut navianartut aamma avatangiisinik qanitatsinnik ajortumik sunniisinnaasut.
Elektronikikut aamma saffiugassanik iluatinnartunik akoqartarput, soorlu assersuutigalugit kanngussa, aluminium, guulti, platin il.il. Aatsitassat akisuut eqqortumik isaterneqarlutillu immikkoortiterneqarunik allaat atoqqinneqarsinnaasarput.
Taamaammat elektronikikut angerlarsimaffinni ulluinnarni igitassanut akuliullugit eqqaavimmut iginneqannginnissaat pingaartuuvoq. Pingaartumillumi ikuallanneqannginnissaat, taamaaliornikkut sananeqaatit toqunartut allat pilersinneqartarmata.
Kommunit tamavimmik tigooraaveqanngillat elektronikikunik immikkoortiterillutik atoqqitassanngorlugit nassiussuisinnaasunik. Taamaakkaluartoq tamakku eqqakkanit allanit immikkoortiterneqarlutik atoqqinneqarnissaasa akilersinnaanngornissaannut eqqaavissuarmi uninngasuutigineqarnissaat suli pitsaanerujuassaaq.
Kommunit eqqakkanut taagorneqartunut ikioraavissanik pisiniarnissap ataqatigiissaarnissaa Nuup Kommuniata Teknikikkut Ingerlatsiviata suliniutigisimavaa.
Qujanaq avatangiisit eqqarsaatigigakkit.
Inussiarnersumik
Søren Alaufesen
KANUKOKA-p siulittaasua
